MAUBISSE, STLTIMORLESTE.com – Prezidente Republika (PR), Jose Ramos Horta fahe nesesidade baziku (NB) ba komunidade vulneravel uma kain 100 nomos ropa ba labarik feto inklui ekipamentu desportu iha Suku Maubisse, Postu Administrativu Maubisse, Munisipiu Ainaro.
Prezidente Republika Jose Ramos Horta ba jornalista sira iha Suku Maubisse, Munisipiu Ainaro, Kuarta lokraik (29/04/2026) hatete, fahe nesesidade baziku nee laos foin iha Suku Maubisse deit maibe antes nee fahe uluk ona ba Komunidade neebe Vuneravel iha munisipiu seluk.
Nesesidade baziku neebe Prezidente Republika fahe ba komunidade Vuneravel sira uma kain 100 kompostu husi foos, mina, supermi, no seluk tan, alende nee fahe mos ropa labarik feto, inklui ekipamentu desportu.
“Ohin ita halo Horta Show iha Maubisse maibe mos aproveita tanba hodiseik ba Suai tanba inundasaun dezastre natural iha neeba. Foin dadaun hau agradese tebes ba kompanha Petroliu Santos hamutuk ho Ministru Petroliu Timor Gap autoridade ho kompanha Eleptor Malazia neebe oferese viajen ho hau ho heliptor ba Suai, depois fo tiha apoiu Umanitariu iha Suai haree situasaun ba mos ho Sekretariu Estadu ba Protesaun Sivil, Governu haree dadaun saida tan mak bele halo I hakat mai iha nee, kleur ona hakarak mai halo programa nee maibe laos deit programa Prezidente Horta Show nee maibe fahe ba hotu hotu,” dehan Prezidente.
Prezidente Republika hatete, povu Maubisse hanesan ezemplu ida iha rai klaran serbisu badinas hodi kuda modo no aifuan halo mos komersiu, ema husi Maubisse ba Dili sosa fehuk, aifuan balun husi Baucau nia lori mai Maubisse, no sira lori produtu maubisse nia ba Dili nemak atividade povu rural nia.
Ho ida nee mak hatudu solidaridade ba ema kiak sira neebe loron loron iha Dili no iha Munisipiu sira buka sira nia moris.
“Nemak hametin fraternidade hametin solidaridade, no fo kontribuisaun oituan ho fos balun ho mina dala ruma hadia ema nia uma sei haree buat balun hadia no halo uma balun iha nee hadia eskola nee laos premeira vez maibe uluk kedas hau nia premeiru mandatu hadia hadia madre sira nia uma kompletu hau mak halo maibe momentu neeba apoiu mai husi Conokoplis sira halo uma no sosa motor ba madre sira no programa nee kontinua nafatin iha Timor Tomak bainhira hau iha kapasidade nuudar Prezidente nuudar ema nuudar eis Prezidente Republika buka apoiu nafatin,” katak PR Horta.
Prezidente Republika hatete, nafatin buka apoiu nafatin ba povu neebe laiha buat ida, no amigo Prezidente nia iha liur haree atividade neebe halo entau barak liu hakarak ajuda husi ema oin oin entau bele halo buat boot liu tan ezemplu liurai Boot Abu Dhabi mos haree no rona serbisu Prezidente Republika halo tanba nee nia mak sei fo finansiamentu 10 milhoens dolar fulan mai edefisiu hahu kontrusaun iha Dili para simu Timor oan feto atus tolu sai husi Kos ba hela iha uma edefisiu modernu.
Xefe Estadu hatete, nia la mai halo politika maibe mai atu fo ajuda ba komunidade Vuneravel sira, “Tanba ita ajuda ema kiak sira labele hanoin fali atu manan buat ruma,” dehan PR Horta.
Nunee mos Xefe Suku Maubisse, Wilson Nivio Maria Pereira Mendonca hatete, komunidade neebe simu nesesidade baziku ho total uma kain 100.
“Komunidade total uma kain atus ida 100 mak ohin simu nesesidade baziku husi nai Prezidente Republika maioria komunidade neebe simu nesesidade bazika nee sira neebe vuneravel, iha suku maubisse iha aldeia 12 no aldeia 12 nee rasik lista vuneravel iha nemak lori mai simu nesesidade bazika husi Prezidente Republika,” katak.
Xefe Suku hatutan tan katak, iha Suku Maubisse komposto husi aldeia 12 ho habitante 7.300 resin ho total uma kain 1000 resin, no sira neebe simu nesesidade baziku husi Prezidente Republika uma kain 100.
(eme)
