MAUBISSE, STLTIMORLESTE.com – Prezidente Republika (PR), Jose Ramos Horta hatete, tenke fo pena todan ba sidadaun estranjeiru neebe hatama osan falsu no hatama droga mai Timor Leste (TL).
Prezidente Republika Jose Ramos ba jornalista sira iha Suku Maubisse, Munisipiu Ainaro, Kuarta lokraik (29/04/2026).
“Nee hau konkorda tenke prizaun todan tanba buat osan falsu nee barak, nee iha mundu ita la kuidadu impaktu boot ba ita nia ekonomia, nee duni Governu liu husi PNTL informa ba publiku kuidadu ho osan bobot $ 100,” dehan PR Horta.
Iha biban nee, Prezidente Republika husu Governu nomos PNTL atu aviza ba publika oinsa kuidadu ho osan falsu sira iha sosiedade nia leet, tanba nee Prezidente husu atu fo pena todan ba sidadaun estranjeiru neebe hatama osan falsu iha Timor Leste.
“Tenke todan para Timor Leste sai pais ida que laiha krime organizado, krime organizado Timor oan laiha, maibe krime organizado sira haree rai fraku ka frajil husi liur sira mai entaun ita tenke atensaun, tanba nee mak hau tinan hira nia laran buka kolabora ho Australia Federal Police,” dehan PR Horta.
Durante nee Prezidente buka halo kolabora ho Australia Federal Police, Indonezia no Singapura no seluk tan maibe Timor Leste tinan 20 resin serbisu metin ho Australia Federal Police. “Tanba ita mesak labele, tanba ema mai husi rai sira besik besik ita nee entan sira mak fo treinu ba ita, fo ekipamentu ho sira nia tulun Timor bele mos husi krime organizado.
Nunee mos Xefe Bankada PLP, Deputada Maria Angelina Sarmento husu atu aplika pena todan ba estranjeiru nain-5 neebe Polisia Nasional Timor Leste liu husi Diresaun Servisu Investigasaun Kriminal (DSIK) detein iha Segunda Feira (27/04) tanba komete kazu droga.
Deputada apresia servisu PNTL liu-liu DSIK neebe bele deteta estranjeiru nain5 tanba komete kazu droga.
“Tuir nia, polisia presiza kaer evidensia neebe mak forte atu nunee ema sira neebe espalla no faan droga no konsumu nee bele hetan efeitu ida todan husi sira nia aktu, liu husi prosesu julgamentu sira iha tribunal to hetan pena no sansaun. Maske que ita nia pais la admite pena morte maibe ita tenki iha pena ida neebe todan liu iha ita nia kodigu penal, tinan hira-hira nee tenki fo ida nee, nee para ita bele dehan efek jera nee iha, lae buat nee espalla iha ita nia rain, ema hatete katak Timor Leste nee frajil tebes ba kazu droga, osan falsu, mafia sira nomos krize jogu online sira, entaun fasil los atu ema tama no kontrola tiha ita nia estadu,” hatete.
(eme)
