DILI, STLTIMORLESTE.com – Maski ukun nain ka elit politika sira kontinua gasta osan Estadu hodi semo ba rai liur, povu trabalhador sira iha rai laran selebra loron 1 Maiu ho laran taridu tanba promesa Governu nian atu hasae salariu minimu nafatin la realiza. Dezigualdade nee hatudu momoos katak kadeira ukun goza hela privileziu luxu nian, enkuantu terus no kosar been trabalhador sira nian Governu selu deit ho lia fuan mamuk kon-ba revizaun salariu minimu.
Bainhira iha fulan hirak liu ba, kofre Estadu loke nakloke hodi kobre gastu viajen membru Governu nian ba rai liur neebe gasta osan barak. Maibe too bainhira kestaun sosial neebe urjente hanesan revizaun salariu minimu atu responde ba folin sasan neebe sae makas (Inflasaun), Governu uza fali birokrasi hodi dada tempu ba desizaun neebe promete ona.
“Ami haree sira goza mundu, semo ba mai iha Lalehan ho osan povu nian, maibe ami nia kolen nee seidauk iha folin. Promesa hasae salariu nee sai hanesan deit ai knanoik hodi hamaus ami nia terus,” dehan Trabalhador ida ho naran Jose da Costa, neebe servisu iha kompanhia balu besik Tasi ibun Lecidere, Dili, Sesta (01/05/2026).
Enkuantu Governu promete bebeik ona atu revee salariu minimu husi montante atual too ohin loron la iha rezultadu konkreta. Politika hein no estuda neebe Governu uza, haree hanesan deit dezinformatizasaun hodi nunee sira bele kontinua gasta osan ba kestaun neebe sira konsideira prioridade hanesan viajen diplomatika no kontratu milhonariu sira neebe kualidade hanesan provizoria ka aat lalais no la dura.
Nunee iha 1 Maiu nee trabalhador sira laos deit ezije osan, maibe ezije integridade husi ukun nain sira. Se Estadu gasta osan ba viajen neebe dala barak la iha impaktu direita ba povu kiik sira, entaun Estadu mos tenki iha kbiit hodi hasae salariu ba sira neebe hatii duni nasaun nee.
“Justisa sosial sei la esjiste se ukun nain sira kontinua goza mundu ho osan povu nian, maibe trabalhador sira kontinua kesi kabun iha sira nia tai rasik,”hatete Trabalhador nee ho lian hirus uituan.
Aleinde nee Observador Ekonomia, Luciano de Jesus kestiona integridade desizaun Governu nian, oinsa mak Estadu bele dehan la iha kbiit finanseiru hodi hasae salariu minimu ba US$ 150 ka US$ 200..” Se iha tempu neebe hanesan sira gasta osan neebe boot liu fali montante nee ba viajen, no serimonia sira neebe la iha rezuktadu konkretu ba povu,” hatete Observador Ekonomia nee.
(car)
