DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu JG, neebe mak komete krime ofensa ba integridade fizika simples ho forma violensia domestika hasoru lezada insial RdS.
Indisiu sufisiente iha autus katak, ofendida RdS moris hamutuk hanesan feen ho laen ho arguidu JG iha tinan 2008, iha oan nain neen no ekonomikamente dependensia ba arguidu.
Iha loron 19 fulan Fevreiru tinan 2025, haleu oras tuku 15:00 OTL, iha Aldeia Laloran Bairo Pite, Dili, arguidu JG hamriik lori liman tuku ofendida nia isin lolon sorin karuk dala rua, arguidu tuku dala haat kona iha ofendida nia ulun, arguidu lori liman tuku dala barak kona iha ofendida nia sorin loos, arguidu kaer ofendida nia liman hodi tuku kona iha ofendida nia rentos no ulun dala barak.
Konsekuensia direta husi arguidu nia hahalok, ofendida hetan moras no bubu iha liman sorin karuk, hiit sae la diak, moras makaas iha ofendida nia ulun no hetan bubu, bubu no moras iha liman sorin los.
Ofendida ba halo tratamentu iha PRADET.
Kauza husi problema nee tanba arguidu ba halo adulteriu ho feto ida mak ofendida tuir ba iha sira uma atu baku arguidu nia adulteriu, mak hodi mosu problema nee.
Arguidu JG halo ho forma livre, deliberada no konsientemente, hatene katak hamriik lori liman tuku ofendida nia isin lolon sorin karuk dala rua, arguidu tuku dala haat kona iha ofendida nia ulun, arguidu lori liman tuku dala barak kona iha ofendida nia sorin los, arguidu kaer ofendida nia liman hodi tuku kona iha ofendida nia ren tos no ulun dala barak, nudar meiu neebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee proibidu no punidu tuir lei penal.
Tanba nee, konstitui arguidu JG, nudar autor material ho forma konsumadu ba pratika krime ofensa ba integridade fizika simples ho forma violensia domestika 1 (ida), previstu no punidu tuir artigu 1450 husi Kodigu Penal konjuga ho artigu sira 2, 3 alinea a) no art. 35 alinea b) husi Lei Kontra Violensia Domestika n.º07/2010, loron 07 fulan Jullu.
Hatan ba akuzasaun nee, arguidu deklara katak faktus neebe mak Ministeriu Publiku imputa ba arguidu nee loos hotu kedas.
Hafoin rona tiha deklarasaun sira nee, Tribunal deside hodi tama ba alegasaun Ministeriu Publiku no parte Defeza nia.
Nunee iha Alegasaun Ministeriu Publiku nia husu Tribunal atu aplika pena multa ba arguidu atu iha futuru arguidu labele repete tan arguidu nia hahalok.
No parte Defeza aseita alegasaun Ministeriu Publiku nia atu aplika pena multa tuir arguidu nia ekonomiku.
No rona tiha parte sira nee, Tribunal deside muda ba loron seluk hodi rona desizaun ikus.
Iha audensia Julgamentu nee prezide hosi Juiz singular, José Gonçalvez, Ministeriu Publiku reprezenta husi Prokuradora Benvinda do Rosario, arguidu hetan asistensia legal hosi Defensor Publiku, Jose Maria Guterres.
(ter)
