DILI, STLTIMORLESTE.com – Prezidente Republika (PR), Jose Ramos Horta hatete, liberdade imprensa nuudar pilar ida ba direitus umanus, motor ba dezenvolvimentu.
Prezidente Republika Jose Ramos Horta hatoo lia hirak nee liu husi nia mensajen ba loron mundial liberdade imprensa iha loron Domingu (03/05/2026).
Prezidente Republika hatete, iha Loron Mundial Liberdade Imprensa ida-nee, selebra ho tema Forma Futuru ida iha dame Promove Liberdade Imprensa ba Direitus Umanus, Dezenvolvimentu no Seguransa.
Dame laos tregua pasiva. Dame mak konstrusaun ativa no diaria no ida nee labele harii se la iha lia-loos.
“No lia-loos sei labele fosai bainhira laiha imprensa neebe livre, independente no aten-barani. Ohin loron, ita-nia mundu fahe ba buat barak. Jornalista sira sai alvu, nonook, ka obriga sai ba ezíliu. Dezinformasaun nakonu iha ita-nia dijital komun sira, hodi halo sidadaun sira kontra malu no hafraku ideia kona-ba realidade partillada. Iha klima hanesan nee, liberdade imprensa nuudar pilar ida ba direitus umanus, motor ba dezenvolvimentu, no kondisaun inegosiavel ba seguransa neebe dura,” dehan PR Horta.
Xefe Estadu hatete Iha Timor-Leste, nasaun joven hatene konsikuensia husi silensiu. hatene katak laho responsabilizasaun, laho naroman husi jornalizmu onestu, fini violensia nian sei kuda. Ohin loron, maski ho dezafiu sira neebe hasoru, ema hili dalan ba transparensia demokratika.
Timor Leste hamriik nuudar farol ba liberdade imprensa iha Ázia. Iha Índise Liberdade Imprensa Mundial neebe foin lalais nee publika husi Reporters Without Borders (RSF), Timor Leste iha pozisaun 30 husi nasaun 180 aas liu iha Sudeste Azistiku, liu fali vizinu boot sira.
Klasifikasaun ida nee mos sai nuudar testemunha ida ba kompromisu neebe metin ba prinsípiu katak mídia livre mak pilar ida ba seguransa nasional.
“Ita tenke asegura katak liberdade ida-nee laos deit estatístika ida, maibe realidade loron-loron nian ba kada editor, reporter, no jurnalista nuudar sidadaun ida-idak iha kada munisípiu. Ita tenke proteje nafatin jornalista sira husi ameasa. Futuru ida neebe iha dame harii husi liman barak – maibe kaneta jornalista nian mak hakerek esbosu dahuluk ho onestu” katak PR Horta.
Xefe Estadu hatete, ba mane no feto sira neebe aten-barani iha media Timor Leste kontinua husu pergunta, investiga, no koalia lia-loos.
Iha Loron Mundial Liberdade Imprensa ida-nee, mai selebra nia jornada to ohin loron. Maibe mai mos reafirma kompromisu ba jornada sira tuir mai ba Timor Leste ida, no mundu ida neebe bele rona lian hotu no Liberdade atu pas neebe dura. Viva Liberdade imprensa Viva Timor Leste.
(eme)
