DILI, STLTIMORLESTE.com – Prezidente Republika (PR), Jose Ramos Horta halo lansamentu ba serimonia lansamentu ba Women in Business Awards 2026 iha Palasiu Prezidensia.
Prezidente Republika Jose Ramos Horta liu husi Diskursu iha Palasiu Prezidensial Nicolau Lobato Bairo Pite, Segunda (04/05/2026) hatete, ho laran haksolok hamutuk ho ekipa halo lansamentu ba Timor Leste Women in Business Awards 2026, neebe selebra vizaun, korajen no determinasaun husi feto emprezaria no líder Timor Leste nian.
“Ho laran ksolok tebes mak ohin hau hamutuk ho ita-boot sira ba lansamentu Timor Leste Women in Business Awards 2026, neebe selebra vizaun, korajen no determinasaun husi feto emprezaria no líder Timor-Leste nian. Premiu sira-nee destaka feto nia lideransa no inspira ema seluk liu liu feto foin-sae siraatu fiar katak sira mos bele kria negosiu, lidera ho konfiansa no hamosu empregu,” dehan Prezidente Republika.
Prezidente Republika hatete, iha rai laran tomak, feto sira dezenvolve negosiu iha agrikultura, turizmu, komersiu, servisu, finansas no setor emerjente sira, hodi kria empregu, hametin komunidade sira no habelar oportunidade ba foin-sae sira, liu liu iha Díli nia liur.
Kriasaun empregu hanesan prioridade nasional ida neebe urjente, no empreza kiik no mediu sira neebe lidera hosi feto sira esensial ba kreximentu inkluzivu. Ho asesu ba finansa, kompetensia, rede no rekonesimentu, feto sira investe laos deit iha negosiu sira, maibe mos iha ema sira.
“Hau enkoraja feto sira husi munisípiu no setor hotu-hotu atu kandidata-an. Lalika laran-rua tanba ita-boot sira-nia negosiu sei buras hela ka ita-boot sira-nia dalan sai dezafiante. Lideransa hatudu liu husi perseveransa, inovasaun no impaktu liu-liu iha kriasaun empregu no kontribuisaun ba dezenvolvimentu nasional,” katak PR Horta.
Xefe Estadu hatete ba instituisaun sira, ba setor privadu no ba parseiru dezenvolvimentu sira apoia feto sira iha negosiu maka desizaun ida neebe matenek husi pontu-de-vista ekonomiku nee investimentu ida iha empregu, produtividade no reziliensia.
“Maibe, hanesan hau hatete beibeik ona, empoderamentu ekonomiku ba feto sira laos esforsu ida neebe izoladu. Presiza kolaborasaun husi setor hotu-hotu sosiedade nian governu, empreza sira, organizasaun komunitaria sira no parseiru internasional sira atu loke odamatan no habelar oportunidade sira. Hau hakarak hatoo parabens ba International Finance Corporation, Asosiasaun Emprezarial Feto Timor-Leste (AEMTL), Banku Sentral Timor Leste (BCTL) no ami nia parseiru sira husi Australia no Nova Zelandia ba sira-nia apoiu finanseiru neebe kontinua. Sira-nia esforsu, liu husi inisiativa sira hanesan Programa Kompetensia Setor Finanseiru nian, kontribui ba kriasaun sistema finanseiru ida neebe inkluzivu no kapasitadu liu ida neebe rekonese no apoia feto sira-nia lideransa iha negosiu,” dehan PR.
Nia hatutan tan katak, sei kontinua apoia trajetoria sira nee ho asesu ba finansiamentu, edukasaun, mentorizasaun no rede sira atu nunee feto hotu-hotu ho mehi iha oportunidade atu halo ida-nee sai realidade.
Nunee mos Prezidente AEMTL, Hergui Luina Fernandes Alves hatoo agradese ba partisipante hotu nia prezensa ba lansamentu Premiu Empreendedor Feto Timor Leste ba edisaun 2026 ka ba da tolu iha salaun Xina palasiu Prezidensia Republika hodi nafatin hatudu vontade atu promove empoderamentu feto ba ekonomia.
“Tinan 3 tutuir malu premio feto iha negosiu Timor Leste halao ho patrisino husi sua exelensia Prezidente Republika Jose Ramos Horta, ami nia apresiasaun no agradese wain ba sua exelensia nia disponiblidade ida nee mesmo okupa ho ajenda nasaun nia maibe nafatin sempre tau importansia ba empoderamentu feto,” katak nia.
Nunee mos David Freedman, Reprezentante Grupu Sanku Mundial ba Timor-Leste hatutan ohin ho ondra boot tanba prezensa husi Prezidente Republika atu lansa Premiu Empreendedor Feto Timor Leste ba edisaun 2026 ba dala tolu.
“Hau sente orgulhu tebes ho hakraik aan katak Prezidente rasik bele fo tempu fo fatin fo nia apoiu ba programa ida nee,” katak nia.
Nia hatete, Prezidente Republika durante tinan 50 resin hatudu ona nia komprimisiu ba justisa sosial ba dezenvolvimentu nomos igualdade, laos ho liafuan deit maibe ho asaun.
(eme)
