DILI, STLTIMORLESTE.com – Ministeriu Edukasaun (ME) hamutuk ho estudantes no profesores sira husi Eskola Cafe selebra loron mundial lian portuguêsa iha edifisiu ME Vila Verde Dili.
Selebra loron mundial lian portuguesa ho misa agradesimentu, neebe halao iha igreja katedral Dili, hafoin misa estudantes ho profesores sira lao marsa ba too iha resintu ME, hodi selebra loron importante refere ho Ministériu Eduksaun (ME).
“Ohin loron mundial ba lingua portuguesa nomos loron lingua portuguesa, 5 de Maio, neebe mak lingua portuguesa nee ita nian lingua ou ita nian lian, nunee mos lian ida neebe mak ita nia luta nain sira luta iha tempu rezistensia, halo ligasaun sira nee hotu barak liu iha lingua portuguesa, durante iha tempu rezistensia, tanba nee lian ida historiku tebe-tebes ba Timor Leste (TL),” dehan Ministra Eduksaun (ME), Dulce de Jesus Soares,ba jornalista iha edifisiu ME Vila-Verde, Tersa nee (05/05/2026).
Nia dehan, ME asume responsabilidade boot liu husi lei baze de edukasaun, neebe mak liu husi konstituisaun atu garante katak, lian ofisial lingua português sai lian ida neebe mak Ministériu kontinua hanorin iha nibel de ensinu hotu-hotu, hahu husi pre eskolar too mai iha ensinu sekundariu jeral nomos tekvo.
“Los duni oras nee daudaun ita bele dehan katak, ema hotu seidauk koalia lian português, maibe hakarak fo hatene katak, tinan-tinan ezame nasional disiplina ida neebe mak hetan valor aas nee mak lingua portuguesa, mezmu iha teste ba Profesor Bolsa Kandidatu, materia ida neebe mak ita bele hetan valor aas liu nee materia lian portuguesa, entaun nonok ema barak la koalia, maibe laos katak, sira la kompriende, tanba deit ita la hatoman ita nia aan, uza lian portuguesa iha ita nia moris loro-loron,” katak nia.
ME Dulce hatutan, indikador ida mak nee ezame nasional, nomos ba iha teste bolsa kandidatu ninia, entaun iha semana ida nee nian laran ME liu husi sirkular ida hatoo ba eskola hotu-hotu, sira atu halo atividades ho lian portuguesa, durante semana ida nee too selebrasaun ohin nian.
(jac)
