DILI, STLTIMORLESTE.com – Eskola hotu iha kapital Dili presiza aumenta sala de aula ba estudantes sira, tanba eskola balun turnu tolu, maibe tenke rezolve fazeadamente.
“Ita nian eskola sira iha Dili laran nee kuaze eskola hotu-hotu presiza aumenta sala de aula, dala ruma espasu atu aumenta sala de aula nee la too, tanba planu Ministériu Edukasaun nomos Prezidente Autoridade Munisípiu Dili iha planu para aumenta sorin labele, nee tenke halo andar, nee presiza halo estudu, nee servisu hamutuk ho diresaun sira no Ministériu relevantes sira, haree oinsa halo prosesu andar nee, posibel ka lae, tanba nee prosesu hirak nee hotu la fasil ida,” afirma Diretor Servisu Edukasaun Munisípiu Dili, Sabino Pereira ba STL iha edifisiu MNEK, Tersa nee (05/05/2026).
Tuir Sabino, dadus nee iha hela, kuaze eskola hotu-hotu, liu-liu ba eskola públiku, hahu husi nibel pre eskolar, ensinu baziku no sekundariu jeral, eskola balun turnu tolu, kuaze eskola sira nee turnu tolu, tanba eskola hirak nee presiza aumenta sala de aula ba estudantes sira, atu nunee prosesu aprendizajen bele lao ho diak.
Nunee mos Carlos Correia nuudar Diretor EBC Manleuana ba STL iha nia knaar fatin Manleuana hatete, oras nee daudaun sala aprendizajen ba estudantes ensinu baziku central (EBC) Manleuana sei limitadu sala ba estudantes, kada sala tenke tur sena malu hodi partisipa iha aprendizajen.
“Kona-ba konstrusaun sala foun neen nee too agora seidauk hahu, maske tenta kontaktu ona ita nian parte infraestrutura nasional no parte PAM, maibe sira la atende, tanba konstrusaun nee rasik seidauk hahu. Ami nian sala ba estudantes sira sei limitaru hela, tanba nee kada sala estudantes too 60 resin, sira tur sena malu deit hodi partisipa iha prosesu aprendizajen ba estudantes sira,” dehan nia.
Carlos salienta, agora daudaun sala aprendizajen hamutuk 15, maibe sala nee seidauk sufisiente ba estudantes, tanba nee ba oin presiza aumenta sala de aula, tanba numeru estudantes kada tinan aumenta, ho nunee sala de aula tenke aumenta para estudantes sira bele utiliza ba iha ensinu aprendizajen iha eskola.
“Kada tinan ita nian numeru estudantes nee sempre aumenta, entaun ita presiza aumenta sala ba ita nian estudantes sira, tanba ita nian konstrusaun sala husi PAM no infraestrutura nasional iha ona, maibe sira seidauk atende,” nia esplika.
(jac)
