DILI, STLTIMORLESTE.com – Prezidente Republika (PR), Jose Ramos Horta husu Corpo Escuteiro Catolico de Timor-Leste (CECTL) atu halo buat diak ba joven no hamutuk uma kreda katolika fo formasaun juvenil hodi hamosu karakter diak ba futuru lideransa Timor Leste.
Prezidente Republika Jose Ramos Horta hatoo kestaun nee, bainhira hasoru malu ho dirijente eskuteiru katoliku neebe lidera husi Pe. Mariano Quintão do Rego iha Palasiu Prezidensial Tersa (05/05/2026). Iha audiensia nee Xefe Estadu apela atu CECTL kontinua halo buat diak ba joven sira hamutuk ho Uma-Kreda Katoliku, fo formasaun juvenil hodi hamosu karater diak ba futuru lideransa Timor-Leste nian, no Prezidente Republika rasik kontinua apoiu ba atividade sira neebe organiza husi CECTL.
Bainhira remata hasoru malu dirizente CECTL, Padre Mariano Quintão do Rego ba jornalista htete durante nee publiku hatene deit katak CECTL sai deit seguransa iha eventu relijiozu ka Igreja Katoliku nian, maibe CECTL mos halao programa seluk hanesan afiliasaun kona-ba formasaun karater umanu no inklui formasaun ema ho natureza tuir fiar katoliku nian.
Padre dehan CECTL eziste iha Timor-Leste hahu iha tinan 1971 husi amu-lulik Timor-oan no misionariu sira, no rezultadu husi ezistensia CECTL too ohin loron kontribui ona ba rekursu umanu hodi produs líder foinsae sira neebe uluk no balun atualmente asume kargu hanesan Primeiru-Ministru, membru Parlamentu, membru Governu no iha pozisaun estratejika sira iha sosiedade.
Aleinde ida-nee, Pe. Mariano Quintão mos aprezenta katak tinan nee sei organiza kongresu nasional hodi halibur CECTL husi Dioseze tolu iha Timor-Leste ho objetivu atu konsolida no harii estrutura nasional ba CECTL.
Pe. Mariano hatete CECTL laos deit nuudar grupu seguransa ka “penjaga” ba igreja nian, maibe nia foku prinsipal mak ba formasaun karakter, identidade, no relasaun entre ema ho natureza.
“Eskuteiru Katoliku iha Timor Leste iha istoria naruk neebe hahu kedas iha tinan 1971, liu husi pioneiru sira hanesan Amu Vitor, Amu Vieira, no Amu Leão. Movimentu nee mos fo ona rezultadu pozitivu hodi forma intelektual no lider sira iha rai laran, hanesan Dr. Rui Maria de Araujo, Dr. Sergio Lobo, inklui mos figura feto hanesan Senora Laura Abrantes,” dehan nia.
Iha biban nee Prezidente Republika Jose Ramos Horta husu eskuteiru sira atu kontinua halao servisu diak hodi ajuda Uma-Kreda iha formasaun ba juventude no labarik sira. Prezidente mos promete katak sei kontaktu pesoal no direta ho dirijente sira atu bele akompana no apoiu atividade sira neebe planeadu ona.
“Mensajen husi Xefe Estadu katak kontinua halao buat diak, uma-kreda nafatin kontinua apoiu ita-nia formasaun juventude ho labarik sira, liuliu ezistensia Korpu Eskuteru Katoliku nian. Nia dehan Hau apoiu masimu atu imi bele oinsa-oinsa deit imi komunika hau direta. Depois imi sei foti ami-nia numeru pesoal, depois ita sei komunika malu liutan. Depois Prezidente mos nia fo resposta pozitivu hotu ba ami-nia konvite neebe sei bolu nia atu ba marka prezensa iha Kongresu Nasional, ao mesmu tempu sei halao atividade Jamboree Nasional ida iha Oecusse. Tanba atu selebra 50 anos liuba ona, maibe ami atu entrega lensu de onra. Ami-nia lensu de onra ho farda sira mak kor sira mak hanesan nee, sira tau nee oinsa atu kuandu ema haree karik nee eskuteru Korpu Eskuteru Katoliku nian,” dehan Padre.
Nia hatete halao buat diak, uma-kreda nafatin kontinua apoiu formasaun juventude ho labarik sira, liuliu ezistensia Korpu Eskuteru Katoliku nian.
Iha audiensia nee, CECTL mos esplika estrutura formasaun neebe fahe tuir idade no kor lensu Lobitos (Kinur-Mutin) Ba labarik sira ho idade kiik. Exploradores Seun tuir mai ba idade neebe sae uitoan. Pioneiros (Azul-Lalehan ho Mutin) Ba etapa formasaun nian seluk. Caminheiros (Mean) Ba idade joven nian. Dirijentes mak Sira neebe dirije no fo dalan ba joven sira atu buka sira-nia identidade rasik.
Aleinde nee mos CECTL informa ba Xefe Estadu katak sira sei halao Kongresu Nasional neebe sei halibur membru sira husi dioseze tolu (Dili, Baucau, no Maliana) ho objetivu atu harii estrutura neebe forte hodi hasoru dezafiu ohin loron nian.
(eme)
