DILI, STLTIMORLESTE.com – Ministra Edukasaun (ME), Dulce de Jesus Soares husu ba okupantes neebe hela iha rai estadu, husu sira idak-idak fila ba sira nia fatin.
“Okupantes sira neebe mak hela iha rai estadu husu ba sira ida-idak atu fila ba fatin neebe mak sira bele hela ba, nee duni governu halao hela responsabilidade, halo responsabilidade fo apoia malu, atu nunee prosesu nee bele lao ho diak, ba eskola sira hau hakarak husu deit inan aman sira katak, eskola nee fatin ida neebe mak ita nia oan sira eskola ba, ita presiza fatin ida neebe mak seguru ba labarik sira katak, fatin nee primeiru tenke moos,” dehan ME Dulce ba jornalista iha sala VIP Ministeriu Edukasaun Vila-Verde, Kuarta nee (06/05/2026).
Nia dehan, eskola nee labele iha buat ruma neebe mak atu prejudika fali prosesu ensinu aprendizajen, ezemplu se karik komunidade sira hela iha areador eskola nian, dala ruma iha prosesu aprendizajen lao hela, bele iha barulhu, entaun ladun seguru ba estudantes sira atu bele aprende ho diak, tanba nee husu ba komunidade neebe mak hela iha areador eskola nee atu bele book aan ba iha fatin sira neebe mak iha ona.
“Eapriensia neebe mak iha ona katak, sira neebe mak atu muda ba iha fatin seluk, ME normalmente ami alista ami hatoo ba eskola, atu nunee ita nian komunidade sira muda husi fatin ida ba fatin seluk, ida nee ita koko saida mak ita ajuda ona iha fatin barak,” nia dehan.
Entretantu Diretor Servisu Edukasaun Munisípiu Dili, Sabino Pereira hatete, eskola 17 nee ida neebe, tanba ladun lembra didiak, tamba eskola 6 mak hasai ona okupantes sira nee lori ba sira nia hela fatin, neen nee mak eskola 10 de Dezembru, Bidau Akadiru-hun, EBC Sergio Viera de Melo, EBC Hera, EBF Bemori, EBC Esperansa da Patria.
“Dadus nee hahu husi inisiu nee hau sempre koalia, eskola neebe okupantes sira hela nee iha 23, inklui areador SEM Dili hamutuk 24, ita konsege lori ona okupantes sira nee fila ba sira nian hela fatin eskola 6, sei falta eskola 17 nee ita nafatin halo kordenasaun ho diresaun relevantes sira,” nia afirma.
Nunee mos Diretor Eskola Sekundáriu Jeral nu. 4 Setembru Balide, Sergio A. da Cruz hatete, Eskola Sekundáriu Jeral nu. 4 Setembru Balide husu urjente ba Ministeriu Edukasaun (ME) atu bele rezolve okupantes iha areador eskola refere.
“Difikuldade neebe mak daudaun nee ami enfrenta mak hanesan ita nian komunidade hela iha eskola laran, sira seidauk sai, sira nia oan lao ba mai iha sala aprendizajen ninia oin no ami nian profesores sufisiente hela. Husu ba parte kompetensia atu rezolve ho emerjensia ligadun ho esforsu neebe hadia, maibe komunidade sira nia oan ba esraga hotu, fiar katak sei rezolve iha futuru,” tenik nia.
Sergio hatutan, bainhira komunidade sira hela iha resintu eskola nian,dala ruma ensinu aprendizajen lao hela, maibe komunidade sira halo movimentu tama no sai iha areador eskola nian.
(jac)
