DILI, STLTIMORLESTE.com – Fornesedor sira husi eskola Baziku Central (EBC) Manleuana uza deit ai sunu, hodi tein programa merenda eskolar ba estudantes sira.
Hatete Diretor Eskola EBC Manleuana, Carlos Correia ba STL iha nia knaar fatin Kinta nee (07/05/2026).
“Ami nian programa merenda eskolar lao diak hela, kona-ba menu merenda nee ami uza nafatin menu ida tuan nee. Aifuan estudantes sira han nafatin, hanesan hudi, aidila, pateka, apel no aifuan seluk tan, nee kada loron ami nian estudantes sira sempre han nafatin, nee duni ami nian estudantes sira han hotu, sira han ho aifuan,” dehan nia.
Nia hatutan, estudantes sira han naan karau, manu tolun, loron Sesta estudantes sira han fore mungu, no estudante 1972 mak asesu ba iha programa merenda eskolar iha sira nian eskola, fornesedor sira uza ai sunu mak tein hahan ba estudantes sira han, tanba nee total fornesedor iha sira nian eskola hamutuk 12.
Iha fatin seluk, Koordenador Ensinu Baziku Filial (EBF) nu. 5 Komoro, Marcelino Moniz hatete, estudantes husi EBF nu. 5 Komoro konsumu aifuan lokal no naan karau iha programa merenda eskolar.
“Implementasaun programa merenda eskolar lao diak hanesan bai-bain, menu neebe mak eskola uza nee hanesan bai-bain, nee mak uza produtu lokal hanesan modo tahan, aifuan lokal, husi pateka, aidila, apel, no ayam potong, sosis, ikan nee la tama iha menu, tanba ami uza deit naan karau,” nia informa.
Nia afirma, nee duni semana ida nia laran sira han deit naan karau, modo tahan no produtu seluk tan, estudantes rihun rua resin mak asesu ba iha programa merenda eskolar, tanba nee kada loron estudantes sira asesu ba iha programa nee ho diak tebes, no ema neebe tein ba estudantes sira nee hamutuk nain 10.
“Ami nian estudantes husi eskola ida nee fahe ba iha turnu haat, tanba nee ema neebe tein ba ita nian estudantes sira han nee nain sanolu, ho nunee tein ba estudantes dader meudia no loraik, tanba ita fahe ba iha turnu haat,” nia haktuir.
(jac)
