DILI, STLTIMORLESTE.com – Eis Prezidente Republika atual Prezidente Partidu FRETILIN, Francisco Guterres Lu Olo hatete, feto neebe inklina aan iha organizasaun feto Timor OPMT iha tempu luta sira fo aan tomak ba luta ukun rasik aan.
Prezidente Partidu FRETILIN, Francisco Guterres Lu Olo hatoo lia hirak nee liu husi nia diskursu V Konferensia OPMT Postu Admnistrativu Nain Feto iha Salaun CNE, Colmera, ho Lema ba Konferensia mak “Solidaridade Interjerasional Dignifika Pasadu, Inspira Futuru. Husi komferensia nee hili Merlinda da Silva Ximenes eleita nuudar Koordenadora OPMT Postu Administrativu Nain Feto.
Tuir anunsiu husi Koordenadora sesante Hermínia Martins, iha abertura Konferensia, eventu ida nee hahu ho kuorum 75 delegadas, inklui, delegadas dezignadas husi kada aldeia no kada suku, neebe mai par-par, eis-responsaveis nain rua, no membrus husi estrutura Konselhu Koordenador Postu Admnistrativu, ho membru efetivu nain hitu.
Partisipa iha sesaun abertura Konferensia ida nee, Prezidente FRETILIN Francisco Gutteres “Lu olo”, Sekretaria-Jeral Interina OPMT, Guihermina Saldanha Ribeiro ho ninia estrutura nasional, no Adjuntu Koordenador Komisaun Polítika Dili, Paulo Soares “ Dagah”.
Liu husi diskursu polítiku, Prezidente Lu Olo fo enfaze ba kestaun hanesan tuir mai nee “OPMT hanesan organizasaun feto Timor, presiza realiza katak uluk, OPMT fo an tomak ba luta ba ita nia rain, iha tempu neebe difísil, OPMT konsege halao knaar militar no polítiku” dehan Eis Prezidente Republika atual Prezidente Partidu FRETILIN Francisco Guterres Lu Olo liu husi Komunikadu Imprensa neebe STL asesu Segunda (11/05/2025).
Eis rezidente Republika Lu Olo hatete aiha tempu neeba, sira la preokupa ho terus no sira nia an rasik, maibe OPMT hanoin ba rai ida nee, no kontinua lori mensajen FRETILIN nian ba Povo hodi hafanun Povu atu kontinua luta ba Ukun Rasi An, ho nunee foinsae sira presiza hatene sakrifísiu ida nee, independensia neebe hetan laos oferta, maibe liu husi terus no sakrifísiu boot ida.
Prezidente Lu Olo mos fo hanoin katak, ohin loron OPMT, hanesan organizasaun masas ba FRETILIN, kontinua hamriik iha FRETILIN nia sorin hodi lori obra ba liberta Povo husi mukit nunee Iha konferensia ida nee, delegada sira presiza desidi OPMT Postu Nain Feto nia estrutura, liu husi hili ema neebe iha vontade no dedikasaun boot ba servisu. No mos diskuti no analiza situasaun iha area saude, edukasaun, agrikultura no ekonomia sustentavel, koalia ba malu saída mak presiza halo tan, atu Povu bele hetan moris diakliu, haree mos ba saída mak realiza ona iha pasadu hodi hateke ba futuru, e kontinua hamutuk ho FRETILIN atu lori FRETILIN fila ba ukun, liuhusi asegura vitoria mai FRETILIN, iha eleisaun 2027.
Membru destakadu husi Komisaun Polítika partidu FRETILIN husi Munisípiu Dili neebe reprezenta partidu iha Konferensia Sub-Nasional OPMT, Paul Soares “Dagga”, fo hatene ninia orgullu ba estrutura OPMT neebe metin nafatin.
“Agradese ba estrutura 1975 neebe mak marka prezensa nafatin ho firmeza no prinsípiu”, no husu ba estruktura neebe eleita atu tane nafatin responsabilidade hanesan OPMT, hodi halao knaar ho responsabilidade tomak.” Dehan Paul.
Guilhermina Ribeiro Saldanha, atual Sekretaria-Jeral Interina OPMT, iha ninia intervensaun fo apresiasaun ba partisipasaun joven sira -nian, neebe mak futuru ba OPMT, iha esperansa katak reorganizasaun iha Postu Admnistrativu Nain feto bele influensia postu sira seluk atu halao konferensia iha tempu badak. Lema “Solidariedade interjerasional: Dignifika Pasadu, Inspira Futuru nuudar ponte atu liga jerasaun foun no jerasaun 1975 liu husi Jerasaun tuan fahe matenek funu nian, nasionalismu, esperiensia jerasaun Foun lori vizaun, matenek, siensia no teknologia atu haburas konesimentu OPMT.
Sekretaria-Jeral Interina mos kontinua husu ba delegada sira atu labele iha distansia, presiza tau hamutuk perspetiva, esperiensia, dignifika pasadu, rekonesimentu ba sakrifísiu neebe iha tiha ona ou foti valor pasadu hodi hametin organizasaun ba futuru ida neebe diak liu tan.
Iha okaziaun hanesan Mariquita Soares, nuudar Koordenadora OPMT Munisípiu Dili, hatoo mos lia menon neebe mak fo importansia ba re-estruturasaun nível Postu too baze, kontinua servisu hamutuk ho feto maluk sira iha baze, buka hatene saída mak sira enfrenta iha moris loron-loron hodi hamutuk buka solusaun ba disafius hirak nee.
Enkoraja estrutura hatene manual politika Partidu, sosializa ho diak no iha tempu eleisaun, mobiliza komunidade mai vota ba FRETILIN iha eleisaun prezidensial no parlamentar.
Ajenda Konferensia ramata tuku 6 lokraik ho juramentu no fo pose husi Koordenadora Munisipal OPMT ba estrutura foun eleita, neebe deside entre sira, fahe knaar hanesan tuir tuir mai Merlinda da Silva Ximenes (Koordenadora), Erminia Martins (Adjunta ), Joaninha A. de Deus (Adjunta), Serzia S. Pinto (sekretaria), no membru lima tan, respetivamente, Joaninha Sobral, Nelcia Smith, Graciela de Araujo, Mariana C. da Silva no Manuela A. Ramos.
Iha serimonia tomada de posse, estrutura foun kompromete kedas katak sei hakbesik-an ba Buiberes iha baze, dinamiza no organiza estrutura sira OPMT nian, no sei mobiliza eleitor sira hodi lori FRETILIN ba vitoria iha eleisaun prezidensial 202 7 no eleisaun jeral 2028.
(eme)
