DILI, STLTIMORLESTE.com – Prezidente Republika (PR) Jose Ramos Horta ho Primeiru Ministru (PM) James Marape iha Melanesian estabelese parseria estratejika Istorika.
Prezidente Republika, Jose Ramos Horta halao reuniaun bilateral neebe importante tebes ho Primeiru-Ministru James Marape iha Melanesian Haus, hodi marka pasu foun ida neebe signifikativu iha relasaun entre Timor-Leste no Papua-Nova Guine.
Tuir komunikadu neebe STL asesu Tersa nee (12/05/2026) hatete, Lider nain rua selebra sira nia istoria reziliensia no eransa Melanezia nian neebe hanesan, hodi promete atu transforma sira-nia respeitu antigu ba oseanu sai parseria estratejika neebe forte.
Prezidente Republika Ramos enfatiza katak Vizita Estadu dahuluk nee serve nuudar ponte hodi liga nasaun rua nee nuudar “Estadu Oseanu Boot” neebe dedika ba estabilidade rejional no dezenvolvimentu mutuu.
Rezultadu xave hosi diskusaun nee mak kompromisu mutuu atu estabelese embaixada permanente sira iha Dili no Port Moresby, hodi fasilita komersiu direta no hametin ligasaun entre povu ho povu.
Lider sira mos konkorda atu hasae Lian Pasífiku iha mundu liu hosi diplomasia koordenada iha Nasões Unidas. Kooperasaun nee inklui akordu estratejiku kona-ba votasaun Konselhu Seguransa ONU nian ba Portugal, neebe refleta Timor-Leste ninia papel uniku nuudar ponte entre CPLP no Pasífiku.
Bainhira sira prepara ba Simeira Oseanu Melanezia nian, lider nain-rua afirma fila-fali sira-nia kompromisu ba “Ekonomia Azul,” hodi garante katak promesa sira ba protesaun oseanu nian bele transforma ba moris-diak neebe sustentavel ba jerasaun foun sira.
(eme)
