BAUKAU, STLTIMORLESTE.com – Governu liu husi Ministeriu Solidariedade Sosial no Inkluzaun (MSSI) apoiu fos kilograma (Kg) 25 hamutuk saka 258 ba familia uma kain 129 iha Suku Bahu, Postu Administrativu Baukau Vila, Munisipiu Baukau.
Diretor Sentru Solidariedade Sosial no Inkluzaun Munisipiu Baukau, Albino Nicolao Freitas aprezenta, familia uma kain 129 kompostu familia vuneravel, difisiensia no idozus abandonadu sira neebe eziste iha Suku Bahu no identifika husi Autoridade Suku iha tinan 2025, neebe relata ba Ministeriu Solidariedade Sosial no Inkluzaun atu apoiu ahi komplementar.
“Tuir lo-loos tinan kotuk ita apoiu oan, maibe estruturamente mudansa entaun hau mai fali hetan informasaun husi Autoridade lokal ohin ita apoiu,” Albino Nicolao Freitas hateten ba jornalista sira hafoin remata sesaun entrega fos simboliza ba familia benefisiariu sira iha sede Suku Bahu, Tersa (12/05/2026).
Nia esplika, objetivu husi apoiu refere atu hakmaan komunidade benefisiariu sira nia nesesidade tuir politika MSSI nian tau matan ba familia vuneravel, difisiensia no idozus abandonadu sira.
Nia rekonhese, tuir loloos aihan komplementar husi MSSI kompostu mina tein, susu been fos no seluk tan, maibe atual sasan sira hanesan mina tein, susu been no seluk tan iha loja kontraktor laiha, nunee deside fahe fos saka Kg 25 ba kada familia saka rua.
“Ita nia aihan komplementar sira nee ita la rai iha armajen ita rai iha kompanhia loja sira neebe mak kontratu, maibe ita prezisa stock laiha ona mak ita apoiu fos kada familia saku rua,” Albino Nicolao Freitas komenta.
Iha fatin hanesan, Xefe Suku Bahu Manuel Francisco Rodrigues Gusmão aprezenta, Suku Bahu lokaliza iha area urbana kapital Baukau nian, iha neebe populasaun sira hela iha area Suku nee mistura, tanba nee Autoridade Suku seidauk identifika hotu familia vuneravel, difisiensia no idozus abandonadu sira nunee foin identifika deit 129, maibe sei kontinua halo indentifikasaun relata ba Ministeriu hodi fo apoiu hanesan.
“Ita sei lao nafatin rekoilha, tanba kategoria laos ba vuneravel deit, maibe ita mos sei haree ba familia kbiit laek sira neebe mak kiak tebe-tebes neebe mak presiza Estadu liu liu ba Ministeriu Solidariedade nia apoiu,” Manuel Francisco Rodrigues Gusmão komenta.
Enkuantu benefisiaria idoza Maria Noemi Ximenes sente kontente ho apoiu refere, tanba bele hakmaan ona nesesidade moris iha loron balu.
“Hau sente kontente husu obrigado ba administrador postu, xefe suku no sosial, tanba ami simu fos,” Maria Noemi Ximenes espresa.
Entretantu familia benefisiariu kompostu vuneravel, difisiensia no idozus abandonadu hamutuk 129 nee husi Aldeia 5 neebe eziste iha Suku Bahu.
(tom)
