DILI, STLTIMORLESTE.com – Sekretàriu Estadu Terras Propriadade (SETP) hamutuk ho jestaun merkadu, akompaña husi autòridade Polìsia Nasionàl Timor Leste (PNTL) hasai obrigatòriu komunidade uma kain hamutuk 25 iha Area Aimutin atu hamamuk fatin, tanba rai estadu nian.
Iha evikasaun nee, maioria komunidade neebe okupa rai estadu la aseita atu hamamuk fatin, tanba komunidade laiha informasaun inklui laiha karta konhesimentu ho SETP.
Maibe ekipa SETP ho jestaun merkadu kontinua lori ekipamentu pezadu, hodi dudu sai moru neebe komunidade sira harii ona, komunidade sira nafatin la fo fatin atu ekipa ori ekxa dudu sai sira nia hela fatin.
Iha fatin hanesan, Komunidade Lorenco Jose Cabral (Aquito Tanque da Guerra) esplika, rai neebe mak daudaun nee komunidade sira inklui nia rasik okupa laos rai privadu ka eransa, nee rai estadu, bainhira estadu hasai desizaun, atu husu komunidade sira hamamuk fatin, tenke koopera ho estadu.
“Buat hotu-hotu desizaun estadu nia liman, se estadu dehan sai, sai, ita hanesan komunidade tenke koopera ho estadu, labele impede dezenvolvimentu, ita mai husi estadu, ita tenke koopera ho estadu,” hatete Komunidade Lorenco Jose Cabral (Aquito Tanque da Guerra) ba jornalista sira iha nia rezidensia atuàl Ai-mutin, Tersa (12/05/2026).
Tanba nee, nuudar ema veteranu tenke koopera ho estadu, tenke hatudu ezemplu diak ba estadu, tanba nee husu komunidade afetadu sira, iha konhesimentu ba evikasaun nee ka lae, nia parte dehan karta nia la hatene.
“Hau koalia hau nia parte deit, hau labele koalia ema seluk nia parte, tanba nee hau hanesan okupante ba rai nee hau prontu koopera no husik fatin,” nia informa.
Nia konta, hahu husi tinan 2016 nia okupa halo ona uma, maibe rai neebe harii uma ba laos sosa husi ema seluk maibe mai okupa deit.
“Rai nee laos eransa hau nian, tanba hau hanesan mai hadau deit hodi okupa, bainhira estadu foti desizaun hasai, hau koopera no tenke sai. Maibe karta ba hau laiha, tanba hau laos rai nain, maibe estadu mai avizu dehan sai hau tenke koopera sai. Hau koopera ho estadu, nain ba estadu tenke koopera ho estadu,” nia deklara.
Tuir observasaun STL nia iha tereinu nota katak, evikasaun neebe ekipa Terras Propriedade no ekipa jestaun merkadu lori ekipamentu pajadu lori forsa hodi dudu obrigatoriu komunidade sira nia uma, maibe komunidade nafatin la koopera tanba laiha karta konhesimentu ruma ba sira.
Marka prezensa iha evikasaun nee, Sekretàriu Estadu Terras Propriedade, Jaime Xavier Lopes, eviksaun nee hetan seguransa màsimu husi membru PNTL.
(jen)
