DILI, STLTIMORLESTE.com – Prezidente Republika (PR), Jose Ramos Horta hasoru malu ho Governador-Jeral PNG, Sir Bob Bofeng Dadae, hodi hametin relasaun bilateral rai rua.
Prezidente Republika, Jose Ramos-Horta, hasoru malu ho Governador-Jeral Governador-Jeral Papua Nova Guine PNG, Sir Bob Bofeng Dadae, iha Government House, nuudar parte husi nia Vizita Estadu istorika no partisipasaun iha Simeira Oseanu Melanezia nian.
Iha biban nee Prezidente Republika Jose Ramos Horta liu husi nia pajina ofisial, Kuarta (13/05/2026) hatete, hasoru malu ho Governador Governador-Jeral Papua Nova Guine hodi hametin relasaun bilateral.
“Hamutuk ho Governador-Jeral Papua Nova Guine, Sir Bob Bofeng Dadae. Hametin liutan relasaun bilateral entre Timor-Leste ho Papua Nova Guine. Ita laos deit vizinu, maibe ita maun-alin iha família boot Melanezia nian,” dehan Prezidente Republika.
Prezidente Republika hatete Nuudar família Melanezia, diskute oinsa atu kria koperasaun ba dezenvolvimentu mutuu, oinsa bele proteje eransa natural, hametin povu nia lian no assegura estabilidade iha rejiaun, garante futuru neebe dame no prosperu ba jerasaun foun iha nasaun rua nee.
Lider nain-rua selebra ligasaun kultural no ansetral neebe klean entre Timor-Leste no povu Melanezia, iha neebe Prezidente enfatiza katak povu Timor barak mak fahe eransa Malaio-Polinezia no Melanezia nian.
Iha reuniaun nee, Prezidente Ramos-Horta mos hatoo gratidaun ba apoiu makaas husi PNG ba Timor-Leste nia adezaun foin lalais nuudar membru tomak ASEAN nian, hodi nota katak integrasaun nee fo oportunidade ekonomika no estratejika neebe luan tebes.
Diskusaun nee foka ba prioridade ambiental sira, liuliu protesaun ba ai-laran tropikal no promosaun ba governansaun oseanu neebe sustentavel.
Aleinde polítika ambiental, lider sira mos esplora kooperasaun bilateral pratika iha setor saude. Prezidente Ramos-Horta propoin parseria ida atu troka profisional saude sira no fahe konesimentu hodi kombate moras tropikal sira hanesan malaria no raiva, hodi foti importansia ba kompromisu hamutuk atu hadiak kbiit-moris no saude povu nian husi nasaun rua nee.
Xefe Estadu hatoo konvite ofisial ida ba Governador-Jeral atu vizita Timor-Leste no mos manifesta nia hakarak rasik atu fila-fali ba PNG hodi vizita rai-aas (Highlands) sira. Hodi foti kestaun afinitade kultural entre rai rua nee.
Prezidente nota katak muzika PNG nian popular tebes iha Timor-Leste no anunsia planu atu konvida muziku sira husi Papua-Nova Guine atu aprezenta iha Díli. Interkambiu kultural nee iha objetivu atu hametin ligasaun entre povu ho povu, hamutuk ho kolaborasaun diplomatika no ambiental neebe formal.
(eme)
