DILI, STLTIMORLESTE.com – Matenek no dedikasaun husi parteira no infermeiru mak sai baze atu fo esperansa ba futuru saude nian iha Timor-Leste (TL).
Liafuan nee haktuir husi Ministra Saude, Élia A.A. dos Reis Amaral liu husi nia diskursu iha selebrasaun oron internasional ba parteiras no enfermeirus ho tema “Salva Moris, Hari Futuru, iha Hospital Nacional Guido Valadares (HNGV), Tersa (12/05/2026).
Liu husi pajina rede sosial Ministeriu Saude (MS), neebe diariu nee asesu iha Kuarta (13/05/2026) hatete, enfermeiru no parteira sira mak sai nuudar sasin no servisu-nain iha liña oin, neebe dader too kalan, fo sira-nia an hodi tau matan ba povu Timor Leste.
“Ba ita-nia enfermeirus, lema tinan neebe dehan “Ita-nia enfermeirus, ita-nia futuru; enfermeirus forte no ho kapasidade salva ema nia moris. Imi-nia matenek no imi-nia dedikasaun mak sai baze atu fi esperansa ba futuru saude nian iha TL,” tenik nia.
Nia katak, ba parteiras ho lema: “Parteira millaun ida tan.” Mundu tomak rekoñese katak nesesidade ba parteira neebe kualifikadu mak urjente tebes. Iha TL, parteira sira iha knaar neebe santu atu garante katak inan ida-idak bele tuur-ahi ho seguru no oan ida-idak bele moris ho ksolok.
“Imi mak heróina sira neebe hatudu kbiit feto nian iha dezenvolvimentu nasaun, empoderamentu ba enfermeiru no parteira sira mos signifika empoderamentu ba feto sira iha TL. Nuudar Ministra Saude, Profisional Saude, Ema Feto no nudar Inan, hau hakarak uza oportunidade nee hodi hatoo Gratidaun profundu ba imi-nia sakrifísiu,” tenik Elia.
Nia afirma, maluk profisional sira hotu, imi mak guarda ba moris foun no esperansa ba sira neebe moras, MS sei kontinua luta hamutuk ho imi hodi dezenvolve imi-nia karreira no kondisaun servisu.
Ba Universidade no Dosente sira iha area Enfermagem no Parteira nian, imi-nia knaar mak fundamental, universidade laos deit fatin atu buka deit koñesimentu sientífiku, maibe nuudar fatin ba aprendizajen sosial no koletivu,. Papel husi inan aman, família, no kolega sira mak baze primeiru hodi forma karakter ba estudante sira.
“Enfermeiru no parteira sira mak primeiru kontaktu ba pasiente sira neebe dala barak enfrenta mos trauma, fustrasaun no moras psikolójiku no psikiatriku. Imi-nia prezensa no imi-nia lian neebe nakonu ho domin mak ai-moruk primeiru ba sira. Iha 2026 nee, mai ita hamutuk hodi hametin kordenasaun, hasae kualidade atendimentu, no servisu ho domin ba ita-nia povu. Mai ita hamutuk, husi uma too Universidade, husi Postu Saude too Ospital Nasional, hodi harii futuru Saude TL nian neebe inkluzivu, kualifikadu, no nakonu ho humanizmu,” hateten Ministra nee.
Selebrasaun nee hahu ho misa agradesimentu no halo renovasaun promesas juramentu profisional ba enfermeiros no parteira HNGV neebe prejidi husi Amu Kapelaun HNGV Pe. Francisco Barreto no akompaña husi Pe. Dionizio Bere ho Pe. Augusto António Galhos iha Kapela Nossa Senhora de Lourdes HNGV.
(dom)
