DILI, STLTIMORLESTE.com – IX Governu Konstitusional iha kompromisu metin ba Programa Merenda Eskolar (ME) no iha vizaun ida neebe luan liu atu asegura katak, labarik ida-idak iha Timor Leste hetan asesu ba merenda eskolar nutritivu hodi apoia sira nia edukasaun no futuru.
Liafuan nee haktuir husi Diretora Jeral Planeamentu, Polítika, Inkluzaun no Informátika, Odilia das Dores Ung Martins, liu husi nia intervensaun iha ambitu halo validasaun nasional SABER – Merenda Eskolar Timor Leste ba tinan 2026, iha salaun ETDA, Fatuhada, Kuarta (13/05/2026).
Iha nia intervensaun, Odilia das Dores hatete, programa merenda eskolar hamriik hanesan inisiativa nasional prinsipal ida-neebe reflete Governu nia kompromisu makaas ba alimentasaun eskolar nuudar investimentu estratejiku ida iha dezenvolvimentu kapital umanu. Kompromisu ida-nee mos hetan reforsu liu husi Dekretu-Lei Nu. 61/2022, neebe promulga iha loron 24 Agostu 2022.
“Timor-Leste iha ona Programa Merenda Eskolar, tanba nee ezersísiu ida-nee fo oportunidade diak atu kompriende programa nia implementasaun too ona iha neebe, inklui ninia forsa no susesu sira, maibe mos identifika lakuna sira atu bele halo melloramentu no buka solusaun apropriadu. Ida-nee laos deit ezersísiu tekniku ida, maibe mos harii fundasaun ida-neebe metin ba ita-nia oan sira-nia futuru,” esplika nia.
Nia argumenta, ezersisiu ida-nee importante tebes tanba laos deit atu halo revizaun ba programa, maibe mos atu dezenvolve planu rasionál ida neebe sei hametin liu tan kualidade no sustentabilidade Programa Merenda Eskolar nian.
“Hau enkoraja partisipante hotu-hotu atu envolve ativamente iha atividade sira liuhusi dialogu nakloke, reflesaun konstrutivu no kolaborasaun. Ita-boot sira nia konesimentu no perspetiva sira esensial atu asegura katak ezersísiu ida-nee fo rezultadu signifikativu no sustentável,” hateten nia
Diretora Jeral nee rekorda fali katak IX Governu Konstitusional iha kompromisu metin ba Programa Merenda Eskolar no iha vizaun ida-neebe luan liu atu asegura katak labarik ida-idak iha Timor-Leste hetan asesu ba merenda eskolar nutritivu hodi apoia sira-nia edukasaun no futuru.
Validasaun Nasional SABER – Merenda Eskolar servisu hamutuk entre Ministeriu Edukasaun, liuhusi Diretora Jeral Planeamentu, Polítika, Inkluzaun no Informatika, hamutuk ho reprezentante husi Ministeriu Administrasaun Estatal, Ministeriu Saude no parseiru dezenvolvimentu sira.
(dom)
