DILI, STLTIMORLESTE.com – Prezidente Republika (PR), Jose Ramos Horta simu Doutor Honoris Causa husi Universidade Charles Darwin.
Prezidente Republika Ramos Horta simu onra akademika prestijiozu liu Doutor Honoris Kausa husi Universidade Charles Darwin. Onra ida nee konfere ba Prezidente Ramos-Horta husi Honoravel Trevor Riley AO KC Chanceler, durante serimonia graduasaun neebe halao ba graduadu liu 2220 iha loron 14 fulan-Maiu tinan 2026 iha kampus Casuarina universidade nian iha Darwin.
Doutor Honoris Causa mak onra akademika aas liu neebe universidade sira fo iha mundu tomak, rekonese pesoal sira ho meritu esepsional no realizasaun durante moris tomak iha area sira hanesan pas, kultura, siensia, no polítika.
Onra nee reprezenta rekonesimentu internasional profunda ba Prezidente nia kontribuisaun estraordinariu no sustentavel ba estabilidade rejional no global.
Iha biban nee Profesora Fiona Coulson, Vise-Reitora no Prezidente Interina hatete Iha nia lideransa Prezidente Ramos-Horta kontinua defende papel universidade sira, akademiku sira, no líder sira iha futuru hodi hametin instituisaun demokratika, promosaun kooperasaun rejional, no rezolve dezafiu global sira neebe kompleksu.
“CDU sente orgullu atu rekonese ema ida-neebe hatudu ona kompromisu durante moris tomak ba pas, demokrasia, no independensia Timor Leste. Ho CDU nia ligasaun neebe klean no dura ho Timor Leste, no ami-nia kompromisu atu haburas oportunidade iha Australia Norte tomak, ida-nee rekonesimentu ida neebe apropriadu ba líder ida neebe respeitadu internasionalmente,” afirma Profesora Fiona Coulson, Vise-Reitora no Prezidente Interina husi komunikadu neebe STL asesu, Kinta (14/05/2026).
Iha biban nee Prezidente Republika Jose Ramos Horta Refleta konaba signifikadu husi onra ida-nee, Prezidente sente ondaradu simu rekoinesementu desizaun husi Universidade UCD.
“Hau iha onra atu rekonese desizaun husi Universidade Charles Darwin hodi konfere mai hau Doutor Honoris Causa. Hau simu distinsaun ida-nee ho haraik-an no agradesimentu sinseru. Rekonesimentu ida-nee hanesan omenajen ida laos deit ba hau-nia viajen pesoal, maibe mos ba reziliensia no aspirasaun povu Timor-Leste nian iha sira-nia persekusaun duradoura ba pas, paz, rekonsiliasaun, no dezenvolvimentu.” dehan PR Horta.
Prezidente Ramos-Horta nia prezensa iha signifikadu partikular ba graduadu, funsionariu no parseiru sira husi Universidade Charles Darwin iha Northern Territory no area sira seluk.
(eme)
