DILI, STLTIMORLESTE.com – Prezidente Republika (PR), Jose Ramos Horta hatete, atu fo indultu ba eis Padre Richard Dasbash, Prezidente Republika sei konsulta ho Primeiru Ministru (PM) Kay Rala Xanana Gusmão nomos parte hotu nia hanoin.
Prezidente Republika Jose Ramos Horta hatoo kestaun nee ba jornalista iha Aeroportu Internasional Nikolau Lobato, Komoro, Kinta (15/05/2026).
Nia hatete, nia seidauk haree lista indultu neebe Governu liu husi Ministru Justisa haruka ba nia, maibe lista iha ona meza gabinete tanba nee Prezidente sei haree no konsulta ho Primeiru Ministru, Sosiedade sivil, Igreja no vitima rasik antes foti desizaun atu fo indultu kalae?.
Prezidente hatete, seidauk haree lei nee, proposta no rekomendasaun husi Governu maibe oras nee iha ona palasiu orsida Prezidente sei ba haree depois sei konsulta ho Primeiru Ministru.
“Hau hanoin iha ona palasiu orsida hau sei haree depois sei konsulta ho Primeiru Ministru, hau tenke haree kazu individual tinan hira ona iha prizaun krime saida iha baze umanitariu ruma kalae? Hanesan uluk fulan kotuk ba indultu tinan ida prizaun iha Gleno inan ida oan mos iha neeba maske krime nee forte omisidiu hau preokupadu ho senhora nee, laliu nia oan entau fo indultu, portantu kazu sira ita haree didiak haree ba idade, tinan hira ona nia kumpre krime nee oinsa loss aida los, sukat buat sira nee hotu koalia ho Primeiru Ministru nee laos halo desizaun mesak maske mai ona husi Governu hau sukat tetu buat hotu hotu,” katak PR Horta.
Karik Primeiru Ministru Aseita ho lista neebe husi Ministru Justisa atu fo indultu ba eis Padre Richard Dasbash kalae? Hatan ba kestaun nee Prezidente Republika Jose Ramos Horta hatete nia ladun hatene posizaun husi Primeiru Ministru, tanba nee Prezidente sei rona opinaun husi Primeiru Ministru.
“Hau lahatene ho primeiru Ministru nee ita nunka hatene saida mak nia posizaun, Hau sei rona lai Primeiru Ministru, hau lahatene assuntu nee nia rasik mak sei koalia karik, maibe lakoalia hau mos sei foti kestaun nee tanba indultu nee tenke sukat kazu hotu hotu idak idak, depois premeiru sei hatete ninia opinaun nia hanoin maibe mai husi konsellu Ministru hau sei tuur mesak rona mos sosiedade sivil lubuk ida ke haruka mensajen ba mai sira nia opinaun mos konta,” dehan PR Horta.
Prezidente Republika hatete moris iha rai demokrasia ida laos rona deit opinaun husi Governu ka rona parlamentu Nasional maibe rona mos sosiedade sivil nia hanoin no opinaun. “Hau sei buka mos opinaun husi Igreza husi Amo Cardeal,” katak PR.
Maibe Prezidente sei rona mos vitima sira nia opinaun kalae? Hatan ba kestaun nee Prezidente Republika hatete sei rona mos opinaun husi vitima sira mos konkorda kalae? Atu fo indultu ba eis Padre.
(eme)
