DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão ofisialmente loke feira kulinaria lokal ho konsertu muzika ba festa komemorasaun loron restaurasaun independensia Republika Demokratika Timor Leste (RDTL) ba dala-24, iha Tasi-Tolu, Domingu (17/5/2026) durante loron tolu (3).
Prezidente Republika, Jose Ramos Horta iha nia diskursu badak hateten, nuudar Prezidente Republika sei la halo diskursu naruk maibe ofisialmente loke deit atividade feiras, tanba prezidente sei halo diskursu iha loron komemorasaun 20 de Maiu, tan nee husu deit ba Nai PM Xanana, Ministru Estatal, Tomas Cabral ho ministru sira seluk mai ita loke atividade feiras nee hodi harame festa 20 de Maiu ba tinan ida nee.
Husu ba hotu-hotu neebe partisipa no organiza eventu ida nee no ba povu doben Timor-Leste (TL) tomak hatoo parabens no hakuak boot ba hotu-hotu mai ita hamutuk asegura eventu ida nee too 20 de Maiu.
Antes atu halo abertura, Ministru Estatal, Tomas Cabral nuudar Prezidente Komisaun Organizador Selebrasaun 20 de Maiu ba dala-24 hateten, liu husi komemorasaun loron restaurasaun Independensia 20 de Maiu ba dala-24 iha tinan ida nee serimonia nasional iha Tasi-Tolu, Dili, ba Munisipiu Dili sei konsentra iha Munisipiu Dili ho Postu Administrativu Metinaro ba teritoriu nasional tomak ida-idak sei prepara-aan halo komemorasaun hanesan, tanba nee iha eventu abertura ba atividade komemorasaun loron restaurasaun independensia TL tinan nee marka prezensa husi Munisipiu Likisa deit, enkuantu husi munisipiu seluk labele marka prezensa tanba ida-idak halo preparativus hodi komemora iha munisipiu.
Ministru Estatal hatoo agradese wain ba PNTL, F-FDTL ho media sira inklui servisu tekniku sira tomak tanba hotu-hotu nia servisu hamutuk hodi alkansa atividade ida nee sei lao ho susesu. “Ho prezensa media ita bele halo transmisaun direta ba eventu istoriku ida nee foka sai ba teritoriu nasional tomak hodi lori povu tomak sira hotu-hotu bele akompanha atividade ida nee iha munisipiu ida-idak,” katak Tomas.
Iha biban nee, Ministru Estatal mos relata ba Prezidente Republika katak hahu dia 18 de Maiu ohin bainaka estranjeiru sira komesa tama ona iha TL liu-liu Sekretariu Jeral ASEAN konformadu, mai mos reprezentasaun husi Governu Australia, Indonezia inklui membru CPLP.
Nuudar Prezidente Komisaun Organizadora, lori komisaun nia naran hatoo mos agradese wain ba ekipa Moradores Postu Administrativu Uato-Carbau, Munisipiu Vikeke neebe tinan ida nee sira mos hetan partisipasaun ba komemorasaun 20 de Maiu 2026 nasional iha Dili.
(ger)
