ZUMALAI, STLTIMORLESTE.com – Kondisaun estrada husi Zumalai Vila ba too iha Zulo Knua hahu aat, tanba kauza husi udan durante semana ida nia laran.
Tuir Rafael Mendonca, hanesan komunidade husi Suku Zulo, Aldeia Lale dehan, estrada ida iha parte Leogol ninia nee kotu, tanba kauza husi udan iha semana ida nia laran, nee transporte públiku no privadu tenke halai neineik, maibe bainhira udan difikulta tebes komunidade hirak neebe halo viajen husi Zumalai ba Zulo Knua.
“Estrada nee foin daudaun udan la para nee mak kotu, nee duni bainhira udan difikulta tebes ami neebe uza motor halo viajen husi Zulo Knua ga too iha Zumalai, laos deit ida nee, maibe estrada balun nakonu ho fatuk,” afirma Rafael iha Zulo Knua, Postu Administrativu Zumalai, Munisipiu Covalima, Tersa nee (19/05/2026).
Rafael dehan, estrada iha parte Zulo Knua ninia nee mos aat, tanba kauza husi uluk rai halai nee too agora husi parte governu seidauk hadia, tanba nee nuudar komunidade husu ba governu atu hadia estrada neebe difikulta komunidade sira iha tempu udan.
“Ami komunidade aldeia haat mak hela iha Zulo Knua no balun mak hela iha Zumalai, aldeia haat nee mak hanesan Aldeia Lale, Leogol, Zulo Tas no Obuk Mil, ami aldeia haat nee mak hela iha Zulo Knua, bainhira ami halo viajen ba Zumalai nee difikulta tebes ami,” katak nia.
(jac)
