DILI, STLTIMORLESTE.com – Prezidente Tribunal Rekursu (PTR) hatoo votu parabens iha ambitu komemorasaun loron restaurasaun independensia Timor Leste ba dala 24.
“Parabens ba povu Timor, tanba tinan 24 ona signifika Timor Leste tama ona idade joven ona, hakarak dezenvolve aan ba futuru nia diak,” dehan Prezidente Tribunal Rekursu, Afonso Carmona ba jornalista sira iha edifisiu provizoriu Supremu Tribunal Justisa Kolmera, Tersa (19/05/2026).
PTR dehan, iha setor justisa durante tinan 24 ukun aan hatudu progresu neebe diak, tanba hahu husi 2002 Timor Leste estabelese iha deit Tribunal Judisial Primeira Instansia, Tribunal Rekursu no agora estabelese tan Supremu Tribunal Justisa.
Nia sublina, setor justisa liga ho ita nia tinan nee, agora ita prepara hela Supremu Tribunal Justisa ho diak, tanba nee mak ita nia Prezidente Republika sei mai iha nee atu haree ita nia preparasaun ba estabelesimentu Instalasaun Supremu Tribunal Justisa.
Iha fatin ketak, Akademiku UNTL, Sebastiao Dos Santos dehan, setor justisa komesa iha mudansa ona, maibe ba oin presiza aumenta tan numeru rekursu umanus.
“Hau hanoin setor justisa komesa iha mudansa ona, ba oin presiza aumenta tan numeru rekursu umanu, atu apoiu servisu Tribunal nian hodi redus kazu pendente sira,” dehan nia.
Hatutan tan, importante duni halo mudansa ba iha setor justisa atu lori justisa lao ba oin.
(ter)
