DILI, STLTIMORLESTE.com – Iha sidade laran, partikularmente iha fatin serimonia boot 20 de Maiu nian iha Tasi Tolu, bandeira nasional RDTL hamriik metin no fo kbiit nuudar husi sinal selebrasaun Loron Restaurasaun Independensia (LRI) ba dala 24. Maibe iha sorin seluk husi haksolok iha tasi ibun Tasi Tolu, selebrasaun nee akontese ho tristeza boot ba povu kiik sira neebe tenke hateke deit ba eskavador ka loder neebe sobu tiha ona sira nia uma no hela fatin husi Governu ho razaun alargamentu no haluan estrada.
Projetu modernizasaun infraestrutura neebe dudu husi Governu sira, dudu mos komunidade kbiit laek balu ba kotuk husik hela deit lian haleriik iha loron istoriku nee.
Bainhira Nai Ulun ka Ukun Nain sira no konvidadu sira festeza fali tinan 24 nia lalaok nuudar nasaun neebe ukun an, loder no makina boot sira duni tiha ona povu kiik sira husi fatin neebe durante nee sai hanesan subar fatin husi anin no udan. Razaun alargamentu estrada neebe foti husi Governu la akompanha ho solusaun ka reallozasaun ka idemnizasaun neebe lojiku, hodi husik hela ironia neebe klean. Nasaun avansa ba oin, maibe nia povu balu tenke lakon fali sira nia direitu fundamental ba hela fatin.
Komunidade ka vitima, Januario Soares sente katak signifikadu husi independensia nee seidauk naroman ba sira nia moris, tanba dezenvolvimentu fiziku neebe lao agora dadaun dadaun foti uluk fali sira nia fatin buka moris loron moron nian.
“Iha selebrasaun boot ba independensia, ami loloos haksolok, maibe realidade mak ami tenke hateke deit ba eskavador ka makina boot neebe sobu ami nia Uma,”dehan Januario ho mata been nakonu ba STL, Tersa (19/05/2026).
Januario hatutan, sira laos kontra dezenvolvimentu neebe Governu halo, maibe sira husu konsiderasaun no lian kbiit laek nian husi ukun nain sira atu labele husik sira moris namlele deit iha ninin estrada nian, laho fatin alternativu ba labarik sira bele mos dezenvolve an ba oin nuudar sidadaun iha rai ukun an nee.
Iha parte ketak Eis Deputadu Partidu Sosial Demokrata (PSD), Leandro Isaac haree katak RDTL sei la hatudu mudansa hodi depende deit ba lider katuas sira nia hanoin neebe la nakloke ba dezenvolvimentu real, Timor-Leste sei la lao ba oin maibe sei hakiduk ba kotuk.” Prova faktual mak nee liu tiha tinan 26 ukun rasik aan, ita nia rai marka pasu deit iha fatin, enkuantu povu nia susar no terus sai deit nuudar teatru politika tinan-tinan,” hatete Leandro.
(car)
