AMBENO, STLTIMORLESTE.com – Governu Autoridade Rejiaun Administrativa Espesial Oecusse-Ambeno (RAEOA) hamutuk ho povu no igreja, realiza misa agradesimentu ba loron restaurasaun independensia Timor Leste (TL) bala 24, iha Igreja Parokia Nossa Senhora do Rosario Oecusse neebe prezide husi Amu Administrador Oecusse, Pe. Florindo de Jesus.
Iha misa agradesimentu nee, partisipa husi Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, Komandante Polisia Nasional Timor Leste (PNTL) Rejional Oecusse, Superintendente Polisia, Nicolao Francelino da Costa ho Sekretariu Rejional nain 3, Diretor Rejional nain 21, Jestor Postu Administrativu Pasabe, Nitibe, Oesilo no Pasabe inklui funsionariu publiku, estudante sira hotu hahu husi Pre-eskolar too ensino superior ho sarani no povu Oecusse.
Tuir omilia Amu Administrador Oecusse, Pe. Florindo de Jesus dehan, ohin selebra misa agradesimentu hodi hanoin loron restaurasaun Independensia Timor Leste (TL) ba dala 24, fo omenajen ba martires da patria neebe luta ba rai ida nee ohin TL sai nasaun soberaniu ida iha rejional ASEAN.
“Ita agradese ba Maromak kbiit tomak neebe tau kbiit no forsa ba Timor oan tomak sira nia luta, harohan ba herois da Patria sira hotu neebe oferese sira nia aan tomak too ohin liberta ona rai doben TL ba dala 24. Ita husu ba ukun nain sira atu kontinua luta ba dezenvolvimentu nakonu ho paz, dame no unidade, liu-liu iha Oecusse, husu ba Autoridade RAEOA hho Estrutura, atu kontinua promove unidade nuuda atoni oan hodi kaer metin liafuan nekaf mese ansaof mese ka neon ida laran ida, kore povu husi kiak no mutuk ba moris diak,” dehan Amo Selebrante misa agradesimentu, Pe. Florindo de Jesus liu husi ninina omilia iha Igreja Nossa Senhora do Rosario Oecusse, Tersa (19/05/2026).
Iha biban nee, husu ba atoni oan sira atu apoiu serbisu autoridade atual ho ninia estrutura, halakon ona pensamentu odio malu, loko aan, sukuizmu, nepotizmu, lolo liman hamutuk halibur Atoni oan sira hotu atu hateke ba futuru dezenvolvimentu rai doben TL, liu-liu Oecusse.
Nia dehan, Komemorasaun 20 de Maiu tinan nee, laos hanoin deit kona ba serimonia no festa, maibe tenke reflete ba reziliensia TL nian, tanba Estadu presiza garante moris diak ba povu hotu hanesan ho oportunidade ba Timor oan hotu hodi bele kompete iha nivel internasional no nasional.
“Oecusse nuudar rejiaun ida neebe sufisial iha Nasaun Demokratiku TL, nee duni ho selebrasaun Restaurasaun Independensia 20 de Maiu nee, bolu ita hotu nuudar Oecusse oan, hodi halo reflesaun, liu-liu ba Prezidente Autoridade ho estrutura tomak, atu ita hamutuk hanoin ba dezenvolvimentu RAEOA nian, hanesan dezenvolvimentu umanu no dezenvolvimentu infraestrutura,” Akresenta Pe. Florindo.
Nia haktuir, Povu Oe cusse nia mehi no nia hakarak mak, presiza dezenvolvimentu too iha area rural. Ida nee hanesan naha todan ida neebe tau hela iha Prezidente Autoridade ho estrutura tomak nia kabas hanesan Kruz, hodi lori hasa todan nee loron -loron too mandatu remata.
“Kaer metin Nai Jesus nia liafuan iha evanjenlhu katak, imi sei hadomi malu nuudar hau hadomi imi,tanba nee, atu progresu dezenvolvimentu iha rai Oecusse lao diak, Oecusse oan sira buka atu hadomi malu, rona malu, fo hanoin ba malu, tau ideas hamutuk hodi halo Oecusse sai rejiaun ida mais progresivu iha tinan sira tuir mai,” afirma nia.
Iha biban nee, Prezidente Autoridade RAEOA, Regio da Cruz Salu hatete, tema ba komemorasaun loron Restaurasaun Independensia tinan nee, importante liu mak liafuan reziliensia, tanba tL ukun aan tinan barak ona, maibe depende makaas ba seguransa alimentar.
“Liafuan reziliensia nee importante, atu nunee povu sai nain duni ba ukun rasik an ida nee no povu bele senti orgullu duni no inspirasaun boot nee nafatin iha povu nia moris, povu nia kreatividade no povu nia bem estar. Estadu tenke kontinua lori dezenvolvimentu too povu iha area rural, tanba tinan 24 ona, desde ita restaura ita nia Independensia, nee ita bele dehan katak, tempu ida neebe ita joven bele deside atu hamrik metin ba nia rai”, haktuir Prezidente Autoridade RAEOA Regio Cruz Salu.
Tema sentral ba komemorasaun 20 de Maiu tinan nee mak, “Hamutuk Ita Sei Hari Patria Neebe Justa, Inkluziva, no Reziliente liu tan”.
Antes nee, Prezidente Komisaun Organizador ba loron restaurasaun Independensia TL ba dala 24, atual Sekretariunal asuntu administrasaun no finansas, Salvador da Cruz dehan, atividades ba koemorasaun loron restaurasaun Independensia 20 de Maiu tinan 2026, iha atividades Isar Bandeira nasional, atividades desportu ho kurida cavalhu no preparasaun lao diak.
(jos)
