DILI, STLTIMORLESTE.com – Ministériu Defeza (MD) Kontra Almirante Donaciano Costa Gomes “Pedro Klamar Fuik” hamutuk ho Vise Primeiru Ministru no Ministru Defeza Austrália, Honorable Richard Marles hametin inkluzivamente kooperasaun ba area defeza no sei asina akordu bilateral iha futuru.
Nia dehan, mai vizita Timor Leste iha ambitu komemorasaun independensia 20 de Maiu, nia mos aproveita vizita Ministériu Defeza (MD).
“Ita hotu hatene katak TL ho Austrália iha relasaun amizade ida muito forte, iha koperasaun iha area bar-barak inkluzivamente iha área defeza,” hatete Ministru Defeza (MD), Kontra Almirante Donaciano Costa Gomes “Pedro Klamar Fuik” hatete ba jornalista sira iha Ministeriu Defeza, Kuarta (20/05/2026).
Ministru Defeza nee esplika, iha momentu nee mos sira diskuti forma oinsa mak atu bele hametin diak liu tan relasaun iha ambitu kooperasaun neebe diak liu ba futuru oin mai.
“Ami mos konkorda ona hodi asina akordu bilaterál ida entre ami depois sei dezenvolve akordu nee iha futuru para hametin liu tan formatu sira seluk neebe mak besik liu tán rai rua nee, para bele defende interese neebe mak hamutuk hakarak ida neebe mak hamutuk, tanba nee mak Ministru mai koalia ho hau,” nia deklara.
Iha fatin hanesan, Vise Primeiru-Ministru no Ministru Defeza Austrália, Honorable Richard Marles sente honradu, tanba bele hasoru malu, nomos nasaun rua nee iha domin boot ba malu, no mos nasaun vizinu sempre fahe interese ba malu.
“Ita nia diskusaun ohin nee marka pozitivu tebes, depois ita haree asuntu seluk tan, liu-liu konaba akordu defeza nia, neebe mak antes nee mos ita halao hotu ona,” nia dehan.
Nia hatutan, hasoru malu ida nee pasu neebe pozitivu tebes, neebe mak sei esforsu hodi realiza iha mandatu sira nee.
“Liu husi asina akordu sira nee ami optimista tebes atu realiza servisu sira liga ba area defeza nia iha parte rua,” nia afirma.
(jen)
