LAGA, STLTIMORLESTE.com – Relasiona selebrasaun loron restaurasaun indepedensia ba dala 24, neebe nivel Postu Administrativu Laga, Suku Ueru-Mata, Munisipiu Baucau, komunidade husu Governu atu instala bee moos no reabilita estrada multi suku iha suku refere.
Komunidade Suku Ueru-Mata, Serafina Paulina Martins hateten, durante tinan 24 Timor Leste ukun aan, maibe progresu dezenvolvimentu iha baze liu liu iha Suku Ueru-Mata, komunidade sei halerik ba bee moos no kondisaun estrada multi Suku entre Suku Ueru-Mata no Saelari tinan naruk difikulta komunidade sira nia movimentasaun, tanba kondisaun aat.
“Ami husu para oinsa dezenvolve liu liu importante mak bee, tanba ami iha nee menus liu ba bee, i liu liu mos estrada tanba husi ami nia Aldeia viznhu ami balun hela iha neeba,” Serafina Paulina Martins hateten ba jornalista sira hafoin remata seremonia isar bandeira ba loron 20 Maiu nian iha Suku Ueru-Mata, Kuarta (20/05/2026).
Nia sublina, durante tinan naruk nia laran komunidade sira utiliza deit bee posu ba hariis, fase ropa, tein no seluk tan, enkuantu hemu nian obrigadu tenke lao distansia beisk kilometru ida, tanba Suku refere iha bee matan, maibe debitu kiik.
Nia mos dehan, Suku Ueru-Mata foin estabelese iha tinan 2025 iha neebe atual komunidade barak sei hela iha Suku anterior Saelari, tanba nee prezisa halo reabilitasaun estrada koneksaun Suku Ueru-Mata no Saelari nunee bele fasilita komunidade sira nia movimentasaun.
Iha fatin hanesan komunidade Suku Ueru-Mata, Jacinto Martins esperesa sentimentu kontente, tanba selebrasaun loron restaurasaun independensia ba dala 24, Autoridade Postu Administrativu Laga deside realiza iha Suku Ueru-Mata, nee nuudar momentu esperansa ba komunidade Suku Ueru-Mata, tanba liu husi seremonia importante nee, Governu Sentral liu husi Autoridade Munisipiu no Postu bele rejolve infrastrutura bazika hanesan estrada no bee moos neebe tinan barak ona, komunidade sira iha Suku nee infrenta.
“Ami husu ba Governu katak ami hanesan Suku foun, maibe hanesan bee bele hadia netik nunee ami bele konsumu netik bee diak nunee bele fo saude diak ba ami komunidade hotu, nomos estrada husi nee ba Suku vizinhu Saelari difikulta ami,” Jacinto Martins rekomenda.
Hatan ba kestaun nee Administrador Postu Laga, João Freitas de Castro hateten, problema bee moos neebe tinan naruk komunidade Suku Ueru-Mata infrenta, Governu sei kore iha tinan ida nee, tanba prosesu sira remata ona no hein atu implementa, maibe kona-ba estrada Autoridade nafatin koordena ho parte kompetente, nunee bele hetan solusaun, tanba tema ba selebrasaun loron 20 Maiu ba dala 24 nee, motiva entidades hotu atu servisu hamutuk solusiona komunidade nia preokupasaun ba infraestrutura bazika sira iha baze.
“Ita hatene katak tema ida nee fo motiva mai ami liu liu ami Autoridade servisu hamutuk entre linha Ministerial hotu, veteranu sosiedade liu liu setor privadu oinsa bele apoiu lori dezenvolvimentu ba ami nia postu Administrativu ida nee,” João Freitas de Castro katak.
Entretantu Suku Ueru-Mata iha Aldeia ida ho total populasaun hamutuk 821 husi Xefe Familia 217.
(tom)
