DILI, STLTIMORLESTE.com – Timor Leste (TL) ohin loron la hanesan uluk, pais ida neebe diferente husi inísiu sekulu ida nee, iha tempu restaurasaun independensia nian, no diferente tebes husi ida neebe eziste iha 1975.
Liafuan nee haktuir husi Prezidenti da Republika Jose Ramos Horta liu husi nia diskursu iha ambitu selebrasaun restaurasaun independensia bá dala 24 iha Tasitolu, Kuarta (20/05/2026).
Xefe Estadu dehan, pais ida nee
maka país ida ho instituisaun sira neeb konsolida liutan, ho infraestrutura sira neebe habelar no jerasaun foun ida neebe kualifikadu liutan no iha ligasaun liutan ho mundu.
Ida nee hanesan oázis ida dame nian, trankuilidade nian, seguransa no toleransia nian iha mundu ida neebe nakonu ho funu sira, krize enerjia, ai-han, ekonómika no finanseira sira, no dezastre natural sira ho frekuensia no intensidade neebe seidauk akontese antes.
“Ita maka país demokratiku ida iha-neebe liberdade sira no direitu fundamental sira hetan respeitu, no ita iha pozisaun diak iha indise internasional demokrasia no liberdade imprensa nian. Ita moris iha país ida neebe laiha tensaun etnika ka relijioza,no iha-neebe krime organizadu ho orijen nasional la eziste no krime violentu sei kiik nafatin, liu liu bainhira kompara ho realidade sira seluk,” dehan Horta.
Nia afirma, país ida neebe, maski nia joven, konsistentemente afirma nia an iha mundu, hodi reforsa relasaun ho país belun no viziñu sira no konsolidania prezensa iha rejiaun no planu internasional
iha CPLP, iha ASEAN, iha Forum Illa Pasífiku nian, iha Grupu g7+no iha sistema Nasoins Unidas nian — ho tempu hanesan adopta no kumpri konvensaun internasional relevante sira.
Iha perkursu afirmasaun esterna nee, destaka adezaun ba Organizasaun Mundiál Komersiu (OMC) no ASEAN, marku diplomatiku sira neebe define Timor-Leste nia pozisaun iha rejiaun no iha mundu.
Iha tinan 2029, Timor Leste sei asumi Prezidénsia ASEAN nian, dezafiu boot ida maibe mós ida neebe aprezenta oportunidade sira neebe labele imajina iha tinan balun liuba.
Transformasaun sira-nee hotu so iha sentidu loloos bainhira reflete iha ema nia moris konkretu. Iha moris-diak família sira-nian, asesu ba kuidadu saude, kualidade edukasaun no oportunidade sira neebe fó ba foin-sae sira maka, ikus mai, sukat susesu dalan nuudar nasaun.
(dom)
