LAGA, STLTIMORLESTE.com – Veteranus tinan 24, Marcelino Inacio da Costa “Mau-Timur” husu jerasaun foun sira neebe atual reprezentante povu iha uma fukun Parlamentu Nasional (PN), respeita lideransa rezistensia sira.
Veteranus nee konta, prosesu luta ba libertasaun neebe iha kontribui mos husi entidades oin oin neebe iha interese atu Timor ukun aan no lideransa sira neebe lidera Timor ba ukun aan mak, Kay Rala Xanana Gusmão atual Primeiru Ministru, José Ramos Horta no lideransa funu nain sira seluk, uluk iha ai laran FALINTIL sira salva, tanba nuudar figura FALINTIN importante neebe tenke proteje too funu remata, maibe hafoin funu remata lori Timor ba ukun aan jerasaun foun balu lakon moral, tanba buka kritika lideransa sira.
“Sira ida jerasaun foun tuur iha Parlamentu neeba hatun ami nia Komadante Xanana ida mak Jose Ramos Horta sai iha televizaun, ami veteranu 24 anus husu kuitadu, tanba nee hau husu ba sira iha Parlamentu labele hasai liafuan ba Aman sira nee,” Marcelino Inacio da Costa “Mau-Timur” hateten ba jornalista sira hafoin remata seremonia isar bandeira ba loron 20 Maiu nian iha Suku Ueru-Mata, Kuarta (20/05/2026).
Nia komenta, jerasaun foun sira neebe atual tuut iha Parlamentu Nasional nuudar reprezentante povu atu hatoo povu nia preokupasaun no kontrola Governu nia servisu, laos ba tuur hodi kritika lider rezistensia sira hanesan Xanana no seluk tan.
Nia konsidera, Xanana nuudar lideransa Nasional uniku no ai rin nasaun nian neebe prezisa jerasaun foun respeita, tanba Xanana nia luta sura labele.
“Xanana nee ami nia komadante boot, uluk iha ai-laran ami salva maun Lere koalia nunee inimigu atake ita kompanhia rua tolu mate hotu mak Maun Xanana mate, tanba nee labele koalia ida nee ida neeba ba hau nia Aman nee,” Mau-Timur katak.
Veteranus nee husu jerasaun foun sira atu respeita no tane lideransa rezistensia sira inklui Xanana nuudar lideransa sagradu Nasaun nian, tanba veteranus sira husi inisiu funu too ohin loron sei respeita lideransa rezistensia sira nee, maibe jerasaun foun sira balu lakon respeitu ba nia lideransa.
(tom)
