DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão ho Embaixador Estraordinariu no Plenipotensiariu Emiradus Arabes Unidus lansa rezidensia estudantil Femenina iha Palasiu Prezidensial.
Bainhira remata serimonia komemorasaun Timor Leste nia indepedensia ba dala 24, Prezidente Republika Jose Ramos Horta prezide serimonia inaugurasaun ba Kompleksu Rezidensia Estudantil Feminina iha Palasiu Prezidensial Nicolau Lobato. Projetu transformativu ida-nee, hetan apoiu husi Sua Alteza Sheikh Mohamed bin Zayed Al Nahyan, Prezidente Emiradus Arabes Unidus, ho objetivu atu promove no hasae asesu ba edukasaun ba joven feto Timor-oan sira husi família vulneravel no ho rekursu limitadu.
Serimonia nee marka pasu signifikativu ida iha amizade bilateral entre Timor-Leste no Emiradus Arabes Unidus, hodi reforsa kompromisu kompartilladu hodi empoderamentu labarik-feto sira liuhusi infraestrutura edukasional neebe seguru no ho kualidade aas.
Pontu prinsipal husi eventu nee mak asinatura Nota Entendimentu (MoU) entre Ministru Negosius Estranjeirus no Kooperasaun. Bendito dos Santos Freitas no Embaixador Estraordinariu no Plenipotensiariu Emiradus Arabes Unidus nian, Abdulla Salem Al Dhaheri. Akordu nee testemuna husi Prezidente Ramos-Horta no Primeiru-Ministru Kay Rala Xanana Gusmão.
Hafoin asinatura, CEO Areem Plus, Dr. Rajeev Mangottil, liu husi diskursu iha palasiu kuarta 20/05/2026 hatoo aprezentasaun detallu ida kona-ba planu projetu nian. Aprezentasaun nee tuir kedas ho serimonia lansamentu primeira pedra neebe lidera husi Prezidente Ramos-Horta, Minister of Foreign Affairs and Cooperation, Bendito dos Santos Freitas no Embaixador Abdulla Salem Al Dhaheri.
Serimonia lansamentu primeira pedra ida-nee partisipa mos husi Vise Primeiru-Ministru Australia nian, Hon. Richard Marles, Eis Ministru Negosiu Estranjeirus Republika Indonezia nian nain Rua, Dr. Hassan Wirajuda no Dr. Marty Natalegawa, Vise-Ministra Negosius Estranjeirus no Kooperasaun, Sra. Jesuína Maria Ferreira Gomes, Korpu Diplomatiku no ofisial sira husi Governu.
Embaixador Abdulla Salem Al Dhaheri liu husi diskursu hatete Inisiativa signifikativu ida-nee mai husi orientasaun no apoiu jenerozu husi Sua Alteza Sheikh Mohamed bin Zayed Al Nahyan, Prezidente Emiradus Arabes Unidus, neebe nia lideransa vizionariu kontinua tau importansia boot ba apoiu dezenvolvimentu sustentavel, edukasaun, no kooperasaun umanitaria iha mundu tomak.
“Serimonia ohin reprezenta faze istoriku ida tan iha relasaun entre Emiradus Arabes Unidus no Republika Demokratika Timor-Leste, refleta ita-nia kompromisu hamutuk atu hametin kooperasaun iha area dezenvolvimentu, edukasaun, no parseria umanitaria,” dehan nia.
Nunee mos Prezidente Republika Jose Ramos-Horta sublina katak rezidensia nee dezena hanesan instalasaun modernu ida neebe inkorpora solusaun teknolojika no ambiental sira neebe avansadu, inklui enerjia solar 100%, sistema rekolla no tratamentu udan-been, resiklajen bee-foer no prinsípiu ekonomia sirkular. Kompleksu nee sei inklui mos biblioteka ida, sala estudu, sala han nian, klínika ida, no espasu verde sira, hodi forma ambiente komprensivu ida neebe apoia dezenvolvimentu umanu no akademiku. Hein atu remata iha tinan 2027, edifísiu nee ho intensaun atu serve hanesan modelu referensia ba futuru projetu infraestrutura publika sira iha Timor Leste, partikularmente sira neebe ho objetivu ba auto-sufisiensia no sustentabilidade ambiental.
“Ohin hanesan loron esperansa no momentum ba oin ba feto foin-sae sira Timor-Leste nian. Edukasaun mak arma neebe poderozu liu atu muda mundu, no ba ita-nia oan-feto sira atu hetan susesu, sira tenke aprende iha seguransa no dignidade. Hau hatoo hau-nia agradesimentu klean ba hau-nia belun, Prezidente Sheikh Mohamed bin Zayed Al Nahyan, ba ninia vizaun laran-luak. Lansamentu primeira pedra ida-nee laos deit inisiu husi konstrusaun fízika ida nee mak materializasaun ba promesa ida neebe halo ba estudante feto Timor-oan sira. Promesa ida katak feto foin-sae ida-idak, la haree ba nia orijen sosial, sei iha asesu ba edukasaun, dignidade, no oportunidade atu harii nia futuru. Hein katak rezidensia ida-nee hamriik nuudar símbolu ida ba esperansa, amizade entre povu no kompromisu ba jerasaun sira iha futuru,” dehan PR Horta.
Rezidensia ba Estudantil Feminina sei fornese akomodasaun neebe seguru no fo apoiu ba estudante sira neebe halao sira-nia estudu iha Dili, hodi ajuda hasai barreira prinsipal ida ba kontinuasaun edukasaun ba feto foin-sae sira husi nasaun laran tomak. Projetu nee tuir envolvimentu kontinua entre Prezidensia, Governu, no parseiru sira iha EAU, neebe reflete kompromisu hamutuk hodi investe iha edukasaun no hakbiit Timor Leste nia lideransa jerasaun foun sira tuir mai.
(eme)
