DILI, STLTIMORLESTE.com – Prezidente Republika (PR), Jose Ramos Horta halao enkontru ho Vise Primeiru Ministru Australia, Richard Marles, hodi haklean kooperasaun rai rua iha futuru.
Prezidente Republika, Ramos Horta halao enkontru ida neebe ho susesu tebes no kordial ho Vise Primeiru Ministru Australia nian, Richard Marles, hodi reafirma parseria neebe dura entre Timor Leste ho Australia hanesan nasaun vizinu iha futuru sai metin liu tan.
Enkontru entre lider nain rua Prezidente Republika Jose Ramos Horta ho Vise-Primeiru-Ministru Australia, Richard Marles halao iha palasiu Prezidensial Nicolau Lobato, Bairo Pite, Kuarta (20/05/2026), bainhira remata partisipa serimonia komemorasaun Indepedensia Timor Leste ba dala 24 iha Tasi-Tolu.
Iha enkontru nia laran Prezidente Republika Jose Ramos Horta hatete povu Timor Leste refleta tinan 24 Timor Leste uku naan no relasaun bilateral ho Australia metin.
“Refleta ba tinan 24 husi relasaun bilateral neebe metin, líder sira rekonese Australia nia apoiu neebe la nakdoko ba Timor-Leste dezde ninia inísiu,” dehan PR Horta.
Iha dialogu nia laran, Vise Primeiru Ministru PM Australia, Marles elojia Prezidente Ramos-Horta nuudar personifikasaun husi relasaun istoriku nee, hodi destaka katak nasaun rua nee fahe destinu neebe klean no iha oportunidade boot ba kooperasaun iha futuru.
Foku sentral ida husi konversasaun nivel altu nee mak atu mantein pas rejional no haforsa seguransa mutua iha meiu husi senariu global neebe sai volatíl liutan. Rekonese estabilidade neebe fahe hamutuk husi ASEAN, Australia no Timor-Leste, líder sira simu ho diak asina neebe besik ona husi Akordu Kooperasaun Defeza nian, hafoin diskusaun neebe produtiva entre delegasaun Australia nian, neebe inklui Emisariu Espesial ba Defeza Luke Gosling, no Ministru Defeza Pedro. Akordu neebe atu mai nee marka pasu signifikativu ida ba oin hodi hametin liutan lasu estratejiku entre nasaun rua nee.
Dialogu nee mos destaka inisiativa sosioekonomika no global sira neebe krusial, ho destake liu ba programa Pacific Australia Labour Mobility (PALM).
Nasaun rua nee promete atu serbisu besik liutan atu garante katak padraun aas liu ba bem-estar no seguransa mantein nafatin ba sidadaun timoroan sira neebe serbisu iha Australia.
Alemde nee, hodi koalia kona-ba dezafiu internasional sira neebe luan liu hanesan situasaun atual iha Mediu Oriente, Prezidente Ramos-Horta no Vise-PM Marles diskute estratejia konjunta sira atu salvaguarda seguransa kombustível no mantein reziliensia iha rejiaun tomak.
(eme)
