DILI, STLTIMORLESTE.com – Relasiona ho informasaun espalha iha media sosial ba produtu merenda eskolar neebe akontese iha EBF 12 Kukuhun Lospalos aat no dodok, fornesedor sira rekonhese.
Diretor Servisu Edukasaun Munisípiu Lautem, Anibal Fernandes dehan, ba asuntu ida nee horibain rua enkontru ona, fornesedor rekonhese katak, produtu nee atraza dois ona, manu mos mate, maibe sira troka fali, fornesedor nee Mokatil mak fornese, nee duni fornesedor ida sosa produtu aat nee, maibe produtu hirak nee troka fali seluk, troka hahan neebe aat nee, hanesan hudi dodok, modo dodok sira nee troka.
“Ita husu fornesedor sira nee atu troka hahan neebe aat para troka fali seluk, oinsa mak atu fornese aihan neebe mak saudavel ba ita nian estudantes sira. Ba oin ita husu fornesedor tenke fornese modo neebe fresku, laos modo neebe dodok, dois no aat ona, depois manu neebe ho kondisaun moras, nee labele,” dehan Anibal ba STL liu husi telefone Segunda (25/05/2026).
Hatan ba Asuntu nee, Belchior Maria Almeida Barros hanesan Xefe Departamentu Programa Merenda Eskokar iha ME katak, merenda eskolar lao hela, foin daudaun ema tau iha media sosial nee iha parte Lospalos ninia, nee iha EBF 12 Kukuhun Lospalos, produtu hirak nee sira tein mak sosa, entaun iha sesta nee kedas husi Diresaun Fiskalizasaun Munisípal tun kedas haree, halo ona koordenasaun, fo ona sansaun ba grupu nee atu hapara sira nian atividades, fo ba ema seluk.
“Ami fo ona orientasaun nee ba Prezidente Autoridade sira liu husi sira nian Diretor Seguransa Alimentar Munisipiu ninia, Diretor Fiskalizasaun Munisípiu nomos Diretor Edukasaun Munisípiu sira, oinsa mak sira atu bele garantia katak, implementasaun nee bele lao ho diak, entermus de formasaun no haree sira nian gastus hira ba produtu sira nee, normalmente liu husi ministériu ita nafatin reforsa komunikasaun atu sira bele haree no tau matan,” dehan Belchior ba STL, Segunda nee (25/05/2026).
Nia hatutan, oinsa melhora diak liu tan, atu nunee programa merenda eskolar nee bele lao ho diak, agora ministeriu nian kompetensia haree deit ona sira nian implementasaun nee lao. Ami halo komunikasaun ho ita nian Prezidente Autoridade sira, oinsa mak sira bele kordena servisu iha nee ba atu fo orientasaun, nee tenke liu husi MAE.
“Parte husi ME nian mak halo koordenasaun deit ho sira, oinsa atu haree implementasaun nee bele lao ho diak, tanba nee ita nafatin halo koordenasaun ho sira para sira bele tau matan nafatin ba programa nee bele lao ho diak. Ita nian esperansa ba iha implementasaun nee mak nee, agora Prezidente Autoridade hotu-hotu bele hatene, ezekuta programa nee tuir duni kalendariu neebe mak ita fo ona ba sira,” nia informa.
Tuir nia, dala ruma tinan-tinan programa nee lao tarde iha Marsu, maibe tinan nee munisipiu ida rua mak lao tarde, maibe munisipiu barak programa nee lao iha fulan Janeiru, tanba nee ME nafatin halo koordenasaun ho parte relevantes sira.
(jac)
