DILI, STLTIMORLESTE.com – Eskola neebe iha area remotas maioria seidauk iha guarda eskola no balun deit mak iha guarda.
“Kona-ba guarda eskola nee, ita presiza guarda ida neebe mak diak nee, tanba ita nian eskola iha area remotas nee maioria mak laiha guarda eskola no balun deit mak iha guarda, nee husi nivel eskolaridade,” afirma Direitor Servisu Edukasaun Munisípiu Lautem, Anibal Fernandes ba STL liu husi telefone, Tersa nee (26/05/2026).
Nia akresenta, eskola barak mak too agora seidauk iha guarda eskola, tanba balun deit mak iha guarda, lo-loos eskola hirak nee tenke iha guarda hodi bele asegura eskola sira nee, tanba balun iha area remotas.
Iha fatin seluk, Diretor Servisu Edukasaun Munisípiu Bobonaro, Miguel Freitas dehan, Servisu Edukasaun Munisipiu (SEM) Bobonaro identifika eskola 27 neebe lokaliza iha munisípiu nee seidauk iha guarda eskola.
“Dadus nee mak ami identifika, lo-loos nee 24, maibe dadus ikus nee 27. Husi numeru nee kompostu nivel pre eskolar, ensinu baziku, sekundariu no ensinu tekniku vokasional, depois mak ami halo pedidu ba ME nasional. Tanba nee, daudaun ami sei prepara hela dadus ida nee, ho nunee bele submete ba nasional,” nia esplika.
Nunee mos Diretor Servisu Edukasaun Munisípiu Ainaro, Patricio da Costa Magno dehan, eskola balun iha ona guarda eskola, maibe balun laiha. Tanba eskola sira iha area remotas nee barak seidauk iha guarda eskola.
“Ita nian eskola balun iha ona guarda eskola, maibe balun laiha. Tanba eskola sira iha area remotas nee barak seidauk iha guarda eskola,” nia informa.
Iha parte seluk, Julio da Silva hanesan Diretor Servisu Edukasaun Munisípiu Likisa hatete, los duni katak, eskola neebe lokaliza iha Munisipiu Likisa nee balun iha guarda eskola no balun too agora seidauk iha guarda.
(jac)
