DILI, STLTIMORLESTE.com – Durante tinan rua ona Eskola Sekundariu Nobel da Paz la hetan konsesaun eskolar, tanba too agora eskola refere seidauk fo desizaun neebe klaru ba Diresaun Nasional Ensinu Sekundariu Jeral husi Ministeriu Edukasaun.
Kestaun nee hatoo husi Diretor Nasional Ensinu Sekundariu iha ME, Benjamin Gomes da Cruz Fernandes ba STL iha salaun Ian Martin Balide, Kinta nee (11/06/2026).
“Ensinu Sekundáriu Novel da Paz, hanesan eskola privadu ida neebe mak tinan rua ona la hetan konsesaun eskolar, tanba sira iha problema internu ida neebe mak seidauk hotu, no sira iha hela parte justisa ninia iha tribunal, seidauk fo desizaun ida mai katak, responsável konsesaun eskolar nee atu atribui los ba se, bainhira ami hetan ona justifikasaun karta husi Tribunal dehan katak eskola nee legal ba se,” nia akresenta.
Nia dehan, bainhira eskola nobel nian kazu nee hotu ona, nee sira bele hetan konsesaun eskolar hanesan ho eskola privadu sira seluk, tanba nee mak laos foin tinan ida nee, maibe tinan hirak ba kotuk mos la hetan konsesaun, dezde Diretor sesante mate, entaun eskola nee iha problema internasional entre sira nian.
“Tanba nee eskola privadu ami la tau kanuru tohar no sira lori malu ba too iha Tribunal ona, desizaun ikus ami seidauk hetan, maibe buat ida konsesaun eskolar nee osan estadu nian, neebe presiza ho kriteriu ruma atu bele atribui,” nia esplika.
Iha parte seluk, Diretor Eskola Sekundariu Nobel da Paz, Jeremias P. de Jesus dehan, los duni katak, tinan hira nian laran Eskola Nobel da Paz la hetan konsesaun eskolar husi Ministeriu Edukasaun, tanba eskola iha problema neebe daudaun nee sei iha hela Tribunal, no bainhira rezolve los ona mak husi eskola sei halo pedidu ba ministériu, atu nunee bele hetan osan ida nee.
“Los duni katak, tinan hira nian laran ami nian Eskola Nobel da Paz la hetan konsesaun eskolar husi Ministeriu Edukasaun, tanba eskola iha problema neebe daudaun nee sei iha hela Tribunal, no bainhira rezolve los ona mak husi eskola sei halo pedidu ba Ministériu, atu nunee bele hetan osan ida nee,” dehan nia.
(jac)
