DILI, STLTIMORLESTE.com – Bainhira profesores sira kada loron la halo planu de aula mak sei afeita ba iha sira nian valor dezempenhu servisu.
Asuntu nee hatoo husi Diretor Eskola Hotelaria no Turizmu Becora, Charles F. Guterres ba STL iha nia knar fatin, Sesta (12/06/2026).
“Hau hanoin kuaze profesores maioria ba prepara planu de aula molok atu hanorin. Karik sira la submete planu de aula mak sei afeita ba sira nian valor dezempenhu servisu, nee duni kada profesores sempre halo planu de aula nee importante tebe-tebes, bainhira atu hanorin estudantes tenke halo planu,” nia informa.
Iha fatin seluk, Diretor Eskola Sekundariu Jeral no 4 de Setembro Balide, Sergio A. da Cruz dehan, Eskola Sekundáriu Jeral no 4 de Setembro Balide kada loron sempre halo kontrola ba profesores sira, karik la halo planu de aula mak parte eskola halo relatóriu ba Ministériu Edukasaun (ME).
“Bainhira ita nian profesores sira dader tama tarde eskola nee lista prezensa mak kontrola sira. Sira la halo planu de aula nee husi parte eskola hatoo Informações ba Inspeção no Edukasaun Munisípiu, los duni sira halo, tanba nee eskola sempre halo kontrola ba ita nian profesores sira,” nia haktuir.
Sergio dehan, kada loron profesores sira tenke halo planu de aula, hafoin sira bele halo prosesu aprendizajen ba estudantes sira, agora bainhira sira la kumpri mak eskola sei relatóriu hodi bele hatoo ba parte Edukasaun Munisípiu no nasional.
Nunee mos Diretor Eskola Sekundariu Jeral 10 de Dezembro Comoro, Manuel Verdial dehan, kada loron profesores ida-idak halo planu de aula, karik profesores balun neebe mak moras no husu lisensa, nee sempre fo hatene ba parte eskola.
(jac)
