ZUMALAI, STLTIMORLESTE.com – Tinan nee loke pre eskolar 23 iha suku neebe seidauk iha ensinu pre eskolar no sei halo konstrusaun ba edifisiu eskola refere iha Munisípiu Bobonaro.
Informasaun nee hatoo husi Diretor Servisu Edukasaun Munisípiu Bobonaro, Miguel Freitas ba STL liu husi telefone, Tersa nee (16/06/2026).
“Ami nian preokupasaun ida seluk mak konaba konstrusaun edifisiu ba pre eskolar, maibe nee tuir ami nian orientasaun ba parte inspesaun sira perkore hotu ona. Pre eskolar neebe foin mak estabelese iha tinan nee hamutuk 17, ninia konstrusaun ba tinan nee eskola 7, sira seluk iha tempu oin mai, nee ita nian governu mak sei halo ida nee. Agora pre eskolar husi UNICEF ninia nee atu halo konstrusaun ba eskola 6, nee foin estabelese pre eskolar ba iha suku neebe seidauk iha eskola pre eskolar,” nia dehan.
Miguel dehan, nee duni total pre eskolar neebe sei halo konstrusaun foun nee hamutuk 23, nee ida-idak nian responsabilidade, tanba sira iha orsamentu, tanba nee pre eskolar neebe foin loke hodi halo konstrusaun foun.
“Hau atu dehan deit katak, edukasaun pre eskolar 23 neebe ohin nee foin mak loke iha ita nian suku neebe mak seidauk iha nivel pre eskolar, tanba nee ita sei halo konstrusaun edifisiu eskola refere iha tinan ida nee,” nia haktuir.
Iha fatin seluk, Superintendente Edukasaun Munisípiu Dili, Cesarina C. Guterres dehan, inspetor hirak nee halo knaar liu husi monitorizasaun neebe halao ba atividades hotu neebe lao iha eskola sira, tantu identifika fasilidade, kondisaun eskola, merenda eskolar, prosesu aprendizajen no seluk tan.
“Hau hanoin liu husi monitorizasaun neebe mak durante nee halo iha eskola balun neebe presiza aumenta sala de aula no balun presiza halo konstrusaun foun ninia, tanba nee balun hahu aumenta sala aprendizajen ba ita nian estudantes sira, ho nunee bele fasilita ita nian estudantes,” nia deklara.
(jac)
