BAUCAU, STLTIMORLESTE.com – Kompanhia implementador projetu reabilitasaun estrada urnaba Baucau Vila neebe responsabiliza ba pakote dahuluk husi area Nagardo Suku Bahu too area Suku Tirilolo, JOVA Construction Unipessoal Lda seidauk halo konstrusuan valeta no moru protesaun pur-volta metru 900, tanba Governu seidauk fo indemnizasaun ba afetadu sira, nunee husu Governu aselera prosesu indemnizasaun ba komunidade afetadu sira.
Tekniku kompanhia JOVA Construction Unipessoal Lda, João da Silva apresenta, daudaun parte kampanhia halao servisu hanesan konstrusaun valeta, moru protesaun, ateru rai mutin no seluk tan iha projetu reabilitasaun estrada urbana Baucau Vila pakote dahuluk husi area Nagardo Suku Bahu nian too area Tirilolo nian, maibe iha parte balu kompanhia seidauk implementa servisu hanesan konstrusaun valeta no moru protesaun, tanba komunidade afetadu sira seidauk simu indemnizasaun husi Governu.
“Dalan husi BOP nian tun ba realistic nian too ba Ending nee maizumenus 700 metrus mak seidauk, husi star point Nagardo nian nee maizumenus 200 metrus mak seidauk sobu, tanba sei hein hela indemnizasaun,” hateten Tekniku husi kompanhia JOVA ba STL iha Baucau, Segunda (29/06/2026).
Nia esplika, afetadu ba projetu refere mak hanesan kioske, moru protesaun privadu sira, uma hela fatin no seluk tan neebe Ministeriu Obras Publikas liu husi tekniku halo ona levantamentu dadus, maibe seidauk atribui indemnizasaun no fo impaktu ba servisu kompanhia nian iha terrenu, tanba servisu konstrusaun ba metrus 900 resin sei pendenti.
Nia komenta, durante implementasaun servisu iha terrenu komunidade afetadu sira koopera no kontribui projetu refere atu kompanhia kontinua halao servisu konstrusaun valeta no moru protesaun metru 900 resin nee, maibe parte kompanhia respeita, tanba nain ba projetu MOP halo ona levantamentu dadus ba indemnizasaun, nunee husu aselera prosesu refere hodi kompanhia aselera servisu.
“Ami husu para publika ona rezultadu para servisu sira tuir mai ami bele aselera servisu neebe sei pendenti nee,” João rekomenda.
Iha fatin ketak, Prezidente Autoridade Munisipiu Baucau, Veneranda Lemos rekonhese, projetu reabilitasaun estrada urbana Baucau Vila iha komunidade afetadu balu too ohin loron seidauk sobu nia kioske, uma hela fatin neebe afeta ba alargamentu estrada refere, maibe nee responsabilidade Governu Sentral nian.
“Hanesan hori bainhirak ita akompanha katak SEATOU mai ho ekipa ADN Obras Publikas sira iha lista rasik indemnizasaun ba afetadu sira nee sei halo, maibe afetadu sira mos tenke hatene kontribui estrada nee halo lalais, husu mos Obras Publikas lalais rezolve buat nee,” katak Veneranda.
Eis deputada nee husu Ministeriu Obras Publikas atu aselera prosesu indemnizasaun ba komunidade afetadu sira nunee parte kompanhia foku ba servisu iha terrenu, tanba atual iha terrenu, iha parte balu kompanhia seidauk konstrui moru protesaun no valeta, tanba sei iha komunidade afetadu neebe seidauk sobu nia propriedade.
Maibe Autoridade Munisipal mos enkoraja komunidade afetadu sira atu kontribui iha prosesu reabilitasaun estrada refere, tanba lista ba identifikasaun iha ona Governu Sentral nia liman.
Enkuantu liga asuntu nee STL tenta konfirma komunidade afetadu balu, maibe lakohi fo komentariu.
Entretantu projetu reabilitasaun estrada urbana Baucau Vila pakote dahuluk neebe responsabiliza husi kompanhia JOVA Construction Unipessoal Lda, progresu fiziku foin atinji 10%.
(tom)
