BAUCAU, STLTIMORLESTE.com – Traktorista sira iha Munisipiu Baucau lamenta ho politika Ministeriu Agrikultura, Pekuaria Peskas no Floresta (MAPPF), tanba halo redusaun ba sira nia osan husi US$ 150 ba US$ 75.
Xefe Mekanizasaun Manuel da Costa Gusmão aprezenta, osan MAPPF koa ou halo redusaun nee osan insentivu nian, neebe durante tinan 2025 ba kotuk kada trimestral pesoal reponsavel traktorista hetan US$ 150 no nia traktorista sira hetan US$ 110, maibe hahu iha fulan Janeiru tinan nee too ohin loron simu osan kada trimestral la atinji montante refere, tanba hetan redusaun.
“Osan nee iha 2026 nee derepente tun, tun nee tun ba neebe ami seidauk hatene, tanba ami nia operador sira nee trimestral ida hetan US$ 60, ami responsavel US$ 75,” hateten Xefe Mekanizasaun Manuel da Costa Gusmão ba jornalista sira iha Caibada Macasa’e, Segunda (29/06/2026).
Nia sublina, reasaun halo redusaun ba traktorista no pesoal responsavel traktorista nia osan insentivu nee, parte kompetente laiha informasaun no enkontru, maibe derepente hetan iha redusaun hahu kedas trimestral dahuluk too daruak nee.
Nia preokupa ho politiku redus osan insentivu ba traktorista, tanba traktorista balu hela iha Postu Administrativu ida ba halao servisu fila rai iha Postu Administrativu seluk, maibe hetan osan insentivu la sufisiente fo impaktu ba servisu fila rai iha terrenu, tanba nee husu Ministeriu haree preokupasaun refere.
“Ami husu Governu atu haree didiak, tanba ami nia kolega husi Munisipiu seluk nia osan simu kompletu, maibe ami nian iha Baucau nee mak derepende tun tiha deit,” Manuel da Costa Gusmão rekomenda.
Iha fatin seluk, Diretor Servisu Munisipal Agrikultura Baucau Agostinho Ximenes hatan, traktorista sira nee funsionariu Ministeriu Agrikultura Pekuaria Peskas no Floresta nian neebe kada fulan simu salariu iha dever no obrigasaun atu halao servisu iha terrenu, maibe Governu haree sira nia salariu la responde nesesidade hotu nunee Governu atribui tan osan insentivu ba sira, maibe tinan nee osan insentivu ba sira hetan redus, tanba bazeia ba Orsamentu Jeral Estadu (OJE) neebe aloka ba Ministeriu.
“Loos duni tinan nee responsabilidade mak hetan US$ 25 kada trimestral hetan US$ 75, sira traktorista kada fulan US$ 20 kada trimestral hetan US$ 60,” Agostinho informa.
Nia rekonhese, iha tinan fiskal 2025 ba kotuk kada traktorista fulan ida hetan US$ 35 no responsavel sira hetan US$ 50, maibe tinan nee halo redusaun, tanba orsamentu neebe Ministeriu aloka husi OJE la sufisiente.
Nia rekonhese traktorista sira nian iha terrenu halao servisu todan, tanba nee kontinua ajusta iha planu orsamentu hodi responde ba sira nia preokupasaun atual.
Entretantu traktorista neebe Ministeriu rekruta utiliza traktor Governu halao servisu fila rai gratuita ba agrikultores sira iha Munisipiu Baucau hamutuk nain 25.
(tom)
