DILI, STLTIMORLESTE.com – Ministeriu Edukasaun (ME) atribui ona konsesaun eskolar ba eskola públiku no privadu hamutuk 83.
Informa Diretor Nasional Ensinu Sekundariu iha ME, Benjamin Gomes da Cruz Fernandes ba STL iha ME, Tersa nee (14/07/2026).
“Atu hatete deit katak, estudantes sira daudaun nee ezame segundu periodu, konsesaun eskolar ba eskola públiku no privadu hotu ami atribui ona seis mezes, katak ba periodu rua primeiru no segundu, agora nee eskola hitu hetan ida nee, laiha eskola ida neebe la hetan, tanba sira hetan hotu osan ida nee, ami agora faze ezame nasional, depois de ezame segundu periodu nee hotu, eskola sira tenke submete relatóriu mai hodi hetan fali fulan lima nian, atu nunee sira bele tama iha ezame nasional ho ezame pasajen nian,” nia esplika.
Nia dehan, montante orsamentu nee ladun rekor, tanba orsamentu boot, eskola sekundariu públiku hamutuk 77, eskola privadu iha 6, konaba relatóriu tinan kotuk nian nee eskola hotu submete ona relatóriu mai iha ME, tanba nee mak husi ME atribui fali konsesaun eskolar nee ba eskola sira nee.
“Depois ezame nee hotu, nee sira tenke submete relatóriu nee mai para ami bele prepara fulan lima nian ba sira, maibe relatóriu ida primeiru nee ita nian eskola hotu hatama tiha ona mai iha ME,” nia afirma.
Diretor Benjamin hatutan, husu nafatin ba eskola sira, karik bainhira ezekuta hotu osan ida nee sira tenke halo fali relatóriu submete mai ministeriu, hodi ministeriu bele prosesa fali konsesaun eskolar ba sira, tanba ezekuta hotu sira tenke halo fali relatóriu.
“Agora daudaun nee ita nian eskola sira sei ezekuta hela osan ida nee, nee duni sira hatene ona katak ezekuta hotu sira sei halo relatóriu mai ami, sira ezekuta tuir nesesidade idak-idak nian neebe mak iha ona,” katak nia.
(jac)
