BAUCAU, STLTIMORLESTE.com – Loron Matebian sai momentu atu sarani sira hanoin matebian sira, selebra fiar, domin no esperansa iha Kristu liu husi Eukaristia.
Selebrasaun nee hato’o husi Padre Vitor da Cunha, SDB, iha omilia misa Loron Matebian nian, iha Estasaun Misionária Nossa Senhora do Rosário de Fátima Wailili, Segunda (2/11/2026).
Padre Vitor dehan, Loron Matebian laos de’it loron ida atu hanoin matebian sira ne’ebé mate ona, maibé mós loron atu selebra ho fiar, maski família sira sente triste no laran moras tanba lakon sira nia maluk.
“Ita selebra hodi hanoin sira, no ita selebra ho fiar, domin no esperansa iha Eukaristia.
Selebrasaun ida-ne’e espresa ita nia fiar iha Kristu, katak Nia mak moris nia hun no mate nia hun. Kristu dehan, sé mak han Hau nia isin no hemu Hau nia ran, nia sei moris iha loron ikus,” hatete Padre Vitor.
Nia esplika katak, aifunan no lilin ne’ebé sarani sira lori iha misa, iha signifikadu espirituál.
Aifunan espresa domin ba matebian sira, enkuantu lilin simboliza esperansa iha Maromak, ne’ebé lori naroman ba moris iha nakukun.
Padre Vitor haktuir katak, Loron Matebian sai oportunidade ba sarani sira atu fó tempu ba matebian sira, liuhusi sunu lilin, reza no hanoin sira durante minutu 20 ka 30.
Nia mós husu sarani sira atu kontinua halo orasaun ba matebian sira, atu sira bele hetan perdaun ba sira nia sala, liuliu ba sira ne’ebé sei iha Purgatóriu.
Misa Loron Matebian nian hahú tuku 08h30 dadeer, ho Padre Vitor da Cunha, SDB, nu’udar prezidente misa.
Tuir observasaun iha Estasaun Misionária Nossa Senhora do Rosário de Fátima Wailili, hafoin misa, sarani balun lori kedas aifunan no lilin hodi tau iha rate matebian sira. Maibé sarani balun seluk sei lori aifunan no lilin ba uma, no lokraik mak foin tau iha rate.
Iha selebrasaun Loron Matebian nian, seguransa masimu asegura husi Polísia Nasionál Timor-Leste (PNTL).
(joa)
