DÍLI, STLTIMORLESTE.com – Prezidente Repúblika (PR), José Ramos-Horta husu povu Timor-Leste atu nafatin halo orasaun ba matebian sira, hodi sira-nia klamar bele deskansa hakmatek iha Reinu Lalehan, iha komemorasaun Loron Matebian, loron 2 fulan Novembru.
Iha mensajen ba Loron Matebian, Segunda (02/2026), Prezidente Repúblika hato’o apelu ba ema hotu atu hanoin no reza ba sira ne’ebé husik ona mundu, hanesan forma ida atu hatudu domin, respeitu no lembransa ba sira-nia moris.
“Mai ita hasa’e orasaun ba sira ne’ebé husik hela ita no la’o uluk ona, hodi hanoin hias sira-nia domin, sakrifisiu no fiar. Hein katak ita-nia matebian hotu-hotu deskansa ona iha pás no dame rohan-laek hamutuk ho Na’i Maromak,” katak Prezidente Repúblika.
Prezidente Repúblika mós hato’o mensajen kona-ba Ksolok Loron Santu Sira no Loron Finadu.
Loron Matebian, ne’ebé komemora kada loron 2 fulan Novembru, mak tempu ida ne’ebé Igreja Katólika no komunidade kristaun sira fó atensaun espesiál ba sira ne’ebé mate ona. Iha loron ida-ne’e, família sira halibur hamutuk atu hanoin sira-nia maun-alin, inan-aman, família no belun sira ne’ebé husik ona mundu.
Iha Timor-Leste, komemorasaun Loron Matebian sai parte importante husi tradisaun relijioza no kulturál. Família barak ba sentru símetériu atu hamoos no hadia rate, tau ai-funan, sunu ahi-kandeiru no halo orasaun ba sira-nia matebian.
Aleinde ne’e, loron ida-ne’e mós sai oportunidade ba família sira atu hametin relasaun espirituál, hanoin fila-fali istória moris, domin no sakrifísiu ne’ebé matebian sira husik ba jerasaun tuirmai.
Iha tradisaun fiar kristaun, orasaun ba matebian konsidera hanesan forma ida atu kontinua hatudu domin no solidariedade ba sira ne’ebé mate ona, ho esperansa katak sira hetan deskansu rohan-laek iha Maromak nia liman.
Nune’e, mensajen Prezidente Repúblika nian konvida povu tomak atu la haluha matebian sira, maibé nafatin hanoin no hasa’e orasaun ba sira, la’ós de’it iha Loron Matebian, maibé iha moris loroloron.
(eme)
