DILI, STLTIMORLESTE.com – Prezidente Republika (PR), Jose Ramos Horta kolabora ho Governu halo preparasaun ba eventu internasional neebe sei halao iha fulan Agostu hodi promove Dezenvolvimentu nasional liu husi desportu ba protesaun ambiental no diplomasia.
Prezidente Republika Ramos Horta hasoru malu ho Komisaun organizadora ba Maratona Internasional Dili no ministru sira ho pasta relevante hodi halo pontu situasaun no finaliza preparasaun ba atividade internasional sira neebe planeadu ba fulan agostu tinan ida nee nia laran.
Iha biban nee Vise Primeiru Ministru Francisco Kalbuadi Lay, nuudar Koordenador Eventu Nasional ba Jornalista iha Palasiu Prezidensial Nicolau Lobato, Bairo Pite, Segunda (13/07/2026) hateten, Governu hamutuk ho Prezidensia Republika, halo preparasaun intensa atu asegura eventu hotu-hotu lao ho diak no tuir padraun internasional.
Visi Primeiru Ministru hatete preparasaun nee realiza tuir orientasaun direta husi Prezidente Republika, Jose Ramos-Horta, no hetan apoiu tomak husi Primeiru-Ministru Kay Rala Xanana Gusmão atu koordena preparasaun nasional hamutuk ho Xefe Casa Civil Prezidensia Republika.
Kalendariu eventu sei hahu iha 4 Agostu ho Horta Show, programa inisiativa husi Prezidente Jose Ramos-Horta atu promove kultura, arte, juventude no turizmu Timor-Leste.
Iha 8 Agostu, Timor Leste sei sai anfitriaun ba Díli Internasional Maratona, eventu desportivu internasional organiza husi Ministeriu Juventude, Desportu, Arte no Kultura (MJDAC) hamutuk ho Federasaun Atletismu Timor-Leste. Too agora, atleta nasional liu ema 400 no atleta internasional liu ema 68 rejista ona atu partisipa.
“Objetivu boot liu mak tau Timor-Leste iha mapa mundial no hatudu ba komunidade internasional katak ita iha kapasidade atu organiza eventu boot ho padraun internasional,” dehan Visi PM.
Iha biban nee Prezidente Republika Jose Ramos Horta hatete, inisiativa sira nee, halao ho patronu husi Prezidente no apoiu husi Governu, ho objetivu atu hametin Timor-Leste nia pozisaun iha nivel global no promove dezenvolvimentu nasional liu husi desportu, protesaun ambiental no diplomasia.
Programa ba atividade fulan Agostu nian bazeia ba pilar boot haat, Programa Prezidente Horta Show, neebe sei hahu iha loron 4 fulan agostu, Dili International Marathon neebe sei halao iha loron 8 fulan-agostu, neebe rejista ona partisipasaun signifikativu husi nasional no internasional, Semana Verde (Green Week) iha sei halao iha loron 16 fulan-agostu hodi promove reflorestasaun urbana, no Pontu prinsipal seluk mak Simeira Siensia ba Dezenvolvimentu husi loron 23 too 25 fulan-agostu.
Iha ambitu husi simeira ida nee, Prezidente Ramos Horta uza ninia ligasaun internasional sira hodi lori laureadu ho premiu Nobel sira no espesialista internasional sira neebe sei partilla konesimentu no esperiensia estudante universitariu rihun ida resin no reprezentante sosiedade sivil sira mai iha Dili.
Durante sorumutuk, Prezidente destaka importansia husi koordenasaun inter ministerial kontínua, envolve setor saude, seguransa, infraestrutura no entidade kompetente sira seluk, hodi garante organizasaun ida neebe diak, seguransa no susesu iha eventu hotu.
Xefe Estadu konklui reuniaun nee ho apelu ba kobertura media neebe forte hodi hatudu nasaun nia progresu iha mundu, hodi sublina katak inisiativa sira-nee importante hodi lori Timor ba mundu no lori mundu mai Timor hodi tau interese nasional aas liu buat hotu.
(eme)
