DILI, STLTIMORLESTE.com – Embaixadora Cuba iha Timor Leste (TL), Alina Aldama relata progresu servisu brigada mediku Cubano sira nian neebe halao iha munisipiu hotu iha Timor ba iha Prezidente Republika (PR), Jose Ramos Horta.
Bainhira remata hasoru malu, Embaixadora Cuba Iha TL, Alina Aldama ba jornalista sira iha Palasiu Prezidensial Nicolau Lobato, Bairo Pite, Tersa (14/07/2026) hatete, ida nee hanesan oportunidade mai relata progresu brigada mediku Cubano sira nian neebe halao iha Timor Leste ba Prezidente Republika Jose Ramos Horta.
“Ohin hanesan oportunidade ida halo enkontru ho sua exelensia Prezidente Republika, iha oportunidade ida nee hanesan mos preveleiju ida hasoru malu ho Prezidente atu koalia konaba servisu konaba kolaborasaun mediku sira neebe iha Timor, tanba brigade mediku servisu too nivel munisipiu, iha 12 munisipiu inklui mos iha Oecusse mai aktualiza konaba prosesu servisu neebe halao iha munisipiu sira,” dehan Embaixadora Cuba ba TL.
Iha hasoru malu nee Embaixadora Cuba ba Timor Leste no Prezidente Republika mos diskute hamutuk konaba kolaboarasaun neebe nasaun rua sei halo hamutuk iha futuru.
“Hau mos koalia ho sua exelensia Prezidente Republika bele haree mos setor sira seluk neebe mak Governu Timor Leste no Cuba bele halo iha futuru. Nomos hatoo hela ba sua exelensia Prezidente konaba senariu ou loron moris Fidel Castro neebe sei halao 13 Agostu, neebe embaixada sei organiza atividade ruma,” katak nia.
Iha biban nee Embaixadora relata konaba ba Prezidente Republika katak, iha fulan Agostu Embaixada Cuba mos sei realiza atividade ida hodi selebra aniversariu Primeiru Ministru Cuba, Fidel Castro neebe mak sei realiza iha fulan Agostu nia laran.
Embaixadora hatutan tan katak, ohin mai enkontru ho Prezidente Republika hodi koalia assuntu relevante sira nee oinsa bele hametin liu tan lasu amizade nasaun rua.
Iha hasoru malu nee Prezidente Republika Jose Ramos Horta husu Embaixadora Cuba ba Timor Leste kontinua hametin kooperasaun apoiu kolaborasaun liu husi solidariedade no Timor Leste bele sai hanesan seklu.
Liga ho Fidel Castro nia aniversariu, Prezidente Republika sei haree nia ajenda husi nasional nomos Internasional depois mak sei informa fali ba embaixada Cuba iha Timor Leste hodi ajusta fali ajenda.
(eme)
