DILI, STLTIMORLESTE.com – Estudantes nain rua (2) husi Eskola Sekundariu Jeral 10 de Dezembro Comoro, durante fulan tolu nia laran sira la tuir ensinu aprendizajen, too ezame mak ba iha eskola no la autoriza sira tuir ezame segundu periodu.
Manuel Verdial nuudar Diretor Eskola Sekundariu Jeral 10 de Dezembro Comoro hatete, ezame segundu periodu nee halao dezde iha loron Segunda nee, maibe estudantes nain rua husi eskola ida nee la tuir ezame, tanba sira nee faltozu, too ezame mak mai ho inan aman dehan sira moras mak la mai eskola, ida nee eskola konsidera sira la fo justifiksaun klaru, nee eskola la autoriza sira nian rua tuir ezame.
“Ita nian estudantes husi eskola nee tuir hotu ezame, maibe nain rua neebe durante nee faltozu, fulan tolu sira la tuir aula husi profesores sira iha sala, no too fali ezame mak mai ho inan aman dehan durante nee moras, ami husu keterangan dokter laiha, moras saida mak estudantes nee mai ho kondisaun diak, isin la tun, bokur hela, nee mak ami konsidera la fo justifiksaun neebe klaru mai ami, oinsa mak ami haruka sira atu tuir ezame,” haktuir Diretor ESJ 10 de Dezembro Comoro, Manuel Verdial ba STL iha nia knaar fatin, Kuarta nee (15/07/2026).
Verdial aumenta, ezame hahu iha loron Segunda too mai ohin loron lao diak no hakmatek, horiseik Tersa nee estudantes sira ezame ba lingua deit, tanba ezame refere sei remata iha loron Sabadu, estudantes nain rua neebe la tuir ezame nee, eskola husu sira hakarak kontinua eskola fulan Agostu mak mai no tenke halo deklarasaun ida katak, hahalok hanesan nee sei la halo tan ba oin.
“Ami husu nafatin estudantes sira katak, mai ezame tama sala, para partisipa masimu iha ezame nee too remata, ita boot sira mak hanesan jerasaun foun ba rai ida nee, nee duni husu ita boot sira nafatin uza oportunidade ho diak, hetan valor neebe diak husi ezame segundu periodu ida nee,” nia esplika.
Nia hatutan, estudantes nee mai eskola tuir aula, laos hanesan estudantes nain rua nee, la tama eskola durante fulan tolu, depois too ezame mak mai iha eskola, nee atu koalia konaba kualidade nee oinsa, dala ruma loron tolu deit mak la tama mos husu surat keterangan, oinsa ho fulan tolu la partisipa iha aula nee.
Nunee mos Domingos de Jesus Martins hanesan estudante husi ESJ 10 de Dezembro Comoro hatete, ezame segundu periodu nee lao diak, mai eskola tenke tama iha sala, atu nunee bele tuir ezame, buat hotu fasil iha ezame, kuandu iha preparasaun neebe mak diak husi estudantes sira, maibe bainhira laiha preparasaun mak buat hotu sei difisil iha ezame.
“Hau hanoin ezame segundu periodu nee lao diak, mai eskola tenke tama iha sala, atu nunee bele tuir ezame, buat hotu fasil iha ezame, kuandu iha preparasaun neebe mak diak husi estudantes sira, maibe bainhira laiha preparasaun mak buat hotu sei difisil iha ezame,” nia dehan.
(jac)
