DILI, STLTIMORLESTE.com – Timor oan nain rua (2), João Zinho Franklin Saldanha no Danilo Guevara Gusmão Viana, neebe oras nee halao estudu iha Jakarta, Indonezia, konsege liu ona iha ezame sertifikasaun internasional MTCNA (MikroTik Certified Network Associate) no MTCRE (MikroTik Certified Routing Engineer), neebe halao iha sentru formasaun ID Networkers, Jakarta.
Tuir João Zinho Franklin Saldanha, atu hetan sertifikasaun ida-nee, kandidatu sira tenki tuir formasaun intensivu no pasa ezame ofisial tuir padraun internasionál husi MikroTik.
Nia esplika katak sira nain rua tuir formasaun MTCNA no MTCRE durante loron lima iha ID Networkers, Jakarta, antes tuir ezame sertifikasaun.
“Ami nain rua konsege hetan pontu 75% no pasa ezame tuir requirementu neebe MikroTik determina. Ho ida-nee, ami hetan sertifikasaun internasional MTCNA no MTCRE, neebe rekonese ami-nia kompetensia teknika iha area networking no routing,” hatete João ba STL liuhusi telefone,Tersa (14/07/2026).
Nia akresenta katak konesimentu no sertifikasaun neebe sira hetan sei sai baze atu fo apoiu ba organizasaun, empresa no kliente sira neebe uza solusaun MikroTik iha Timor-Leste, liuliu iha area konfigurasaun, administrasaun no manutensaun infraestrutura rede.
“Ami prontu atu fahe esperiensia no ajuda kliente sira neebe uza MikroTik, tantu ba konfigurasaun, manutensaun, rezolusaun problema no implementasaun rede foun tuir nesesidade,” dehan nia.
(alb)
