DILI, STLTIMORLESTE.com – Imajen husi joven ida neebe tanis no hetan seguransa husi membru Polisia Nasional Timor Leste (PNTL) viral tebes iha Media Sosial Facebook, bainhira Governu liu husi Sekretariu Estadu Asuntu Toponímia no Organizasaun Urbana (SEATOU) halao asaun sobu uma iha Aldeia Marinir, Suku Madohi, Postu Administrativu Dom Aleixo, Munisipiu Díli.
Asaun sobu komunidade nia uma ka hela fatin nee nuudar parte husi implementasaun projetu alargamentu Aeroportu Internasional Nicolao Lobato. Joven iha imajen nee labele kontrola ninia emosaun no lian tanis tanba tenke haree fatin neebe sira hela ba durante nee harahun husi ekipamentu pezadu sira.
Publikasaun imajen nee dada atensaun boot no hamosu reasaun oi-oin husi utilizador media sosial sira. Komunidade barak mak hatoo sira nia preokupasaun sosial no sentimentu solidariedade ba komunidade sira neebe afetadu husi dezenvolvimentu infraestrutura nee.
Imajen akontesimentu neebe viral kedas desde horiseik (Tersa-red) bainhira SEATOU ho ekipa lori loder ba sobu komunidade sira nia hela fatin, too agora kontinua sai topiku diskusaun no hetan atensaun seriu nafatin iha mundu dijital. Sidadaun barak mak halo publikasaun fali no komentariu husi sira nia hanoin konaba situasaun komunidade Marinir nian.
Projetu alargamentu Aeroportu rasik nuudar projetu estratejiku Governu nian hodi hasae kapasidade no padraun Internasional ba portaun prinsipal Timor-Leste nian. Maski nunee, ezekusaun iha terrenu kontinua enfrenta dezafiu boot, liuliu konaba oinsa koordena ho Komunidade no fo indemnizasaun neebe justu ba sidadaun sira.
Konaba kestaun nee Akademista UNTL, Lucas da Silva, foti lian hodi fo hanoin katak dezenvolvimentu infraestrutura Governu halo tenke lao hamutuk ho kondisaun sosial ba sidadaun sira. Tuir nia implementasaun projetu boot sira hanesan alargamentu aeroportu labele haree deit ba dezenvolvimentu fiziku, maibe tenke konsideira didiak mos impaktu sosial no garantia fundamental sidadaun sira nian ba hela fatin neebe dignu, nunee labele hamosu trauma no terus ba povu kiik.
“Hau hanoin kazu sobu uma neebe viral no dada atensaun publiku nian nee hatudu momos ketak planu ukun nian labele hadook an hosi realidade moris povu nian. Bainhira ekipamentu pezadu ka loder sobu hela fatin no lian tanis hamosu fali preokupasaun iha Marinir, nee sai hanesan sinal boot ida katak Governu presiza duni hadia mekaniznu komunikasaun no responsabilidade sosial, nunee labele husik sidadaun sira hasoru dezafiu no terus mesak iha konstrusaun nia laran,”dehan Lucas ba STL, Kuarta nee (15/07/2026).
Nia dehan, atu labele kria instabilidade sosial no prezudika sidadaun sira, Governu labele foti desizaun mesak deit hodi duni deit povu laho solusaun neebe klaru, Tanba nee, nia sujere ba Governu atu fo uluk alernstiva hela fatin foun ka kompesasaun neebe adekuadu ho lalais, molok ekipamentu pezadu sira tama sobu komunidade sira nia uma.
Iha fatin seluk, Observador Politika, José Mendonça, fo ninia komentariu hodi sublina katak kazu Marinir nee sai nuudar reflesaun boot ba Governasaun neebe diak. Tuir José, tensaun iha terrenu hatudu katak, iha falhansu iha foti desizaun neebe inkluzivu, no situasaun hanesan nee bele hamenus konfiansa povu nian ba planu foun sira nee. Nis husu ba nai ulun sira atu tau prioridade ba dislogu hodi nunee interese nasional ba infraestrutura modernu bele lao ho pas, laho nesesidade atu sakrifika dignidade povu nian.
(car)
