DILI, STLTIMORLESTE.com – Relasiona jogu online Scamming Call Centre neebe oras nee daudaun autoridade seguransa detein barak, husi parte Jurista nian konsidera katak, medida neebe Tribunal aplika seidauk adekuadu, bele prosesu arguidu sira iha Tribunal, maibe dalan diak deporta sira fila ba iha sira nia rai orijen.
“Hau nia hanoin Jogu online Scamming Call Centre nee konsidera hanesan kriminalidade organizada transnasional, tanba nee mak medida kausaun neebe Tribunal aplika nee seidauk adekuada no proporsional, aleinde prosesa arguidu sira iha Tribunal, maibe dalan diak liu mak estadu deporta sira ba sira nia pais hodi bandu sira labele tama fali Timor Leste,” dehan Jurista Sergio Dias Quintas ba STL iha Kaikoli, Kuarta (15/07/2026).
Tuir Sergio, krime sira neebe Ministeriu Publiku akuza ba arguidu sira nee mesak krime neebe bem juridiku protejidu nee ba nasaun nia vida, entaun atu kombate krime sira tenki liu husi prevensaun no represaun.
Aktual Defensor Publiku nee esplika, ba prevensaun papel sosiedade sivil nian mak importante tebes, bainhira sosiedade sivil hetan informasaun barak liu, sei prepara aan diak liu atu ezije ba estadu.
Konsidera, pertenente represaun inklui mos prevensaun jeral no espesial, liu husi prova katak krime sei la lori benefisiu.
Iha sorin seluk, Akademiku UNTL, Rafael de Jesus dehan, oras nee daudaun kazu online buras iha Timor, tanba nee presiza halo prevensaun agora.
“Hanoin tempu ona atu halo prevensaun, se la halo prevensaun mak ema sei kontinua tama husi nasaun seluk mai pratika sira nia atividade iha nee,” dehan nia.
Akresenta tan, medida neebe foti ba sira tenke todan, atu nunee sira tauk atu labele halo tan, no sai mos referensia ba sidadaun husi nasaun sira seluk, atu tama iha Timor sira labele pratika aktu neebe ilegal.
Rekorda katak, konaba kazu jogu online Scamming neebe lori mai iha Tribunal, iha Metiaut nian arguidu nain 27 Tribunal aplika medida tolu hanesan Termo Indentidade Rezidensia (TIR), proibisaun de Auzensia no kausaun kada arguidu US$ 3000.
Arguidu nain 28 neebe kaer iha Manleuana, Tribunal aplika medida haat, medida Termo Indentidade Rezidensia (TIR), medida Aprezentasaun Periodika (AP), medida Proibisaun de Auzensia, no medida kauzaun kada arguidu US$ 2.500.
No arguidu nain 96 neebe kaer iha Bebonuk ho medida tolu, Termo Indentidade Rezidensia (TIR), Medida Proibisuan de Auzensia no kauzaun kada arguidu US$ 3.000.
No oras nee foin detein tan arguidu balu iha Ulmera Likisa, no iha parte Komoro nian balu hodi submete ba iha Tribunal.
(ter)
