DILI, STLTIMORLESTE.com – Tribunal Judisial Primeira Intansia Dili (TJPID) iha loron Kuarta (15/07/2026) liu husi leitura akordaun, deside aplika pena suspensaun ba arguidu BS, tanba provadu komete krime omisidiu ho forma Tentada no Arma Branka hasoru lezadu Jasinto Maia iha Ermera.
Iha desizaun, Juiz prosesu Ivan Patrocenio deklara katak, iha sala julgamentu antes nee arguidu konfesa ba faktus, katak motivu husi problema nee tanba lezadu sira dun arguidu iha relasaun domin ho feto ida, tanba nee mak arguidu la aseita ba husu lezadu no ikus mai arguidu lori katana taa ba iha lezadu.
Tribunal mos konsidera provadu katak, depois akontese tiha problema, arguidu buka tuir lezadu hodi fo sala ba iha lezadu hanesan fahi ida no osan US$ 250. No lezadu mos fo fali tais ida ba iha arguidu.
Tribunal konsidera provadu katak, arguidu no lezadu diak malu ona, sira rezolve tuir familia tanba iha akordu dame nian.
Maibe koletivu haree katak, fahi no osan neebe arguidu fo ba iha lezadu hanesan sirkunstansia ida, maibe kondenasaun ba iha krime nee kontinua iha atu bele halo prevensaun iha futuru. Tanba arguidu nia aktu hamosu kanek iha lezadu nia rentos.
Tribunal koletivu entende katak, Krime Arma Branka no omisidiu ho forma tentada neebe Ministeriu Publiku akuza ba iha arguidu provadu hotu. Tanba nee, se arguidu la rezolve familia, arguidu sei hetan kondenasaun efetivu.
Maibe Tribunal tetu katak, arguidu arepende nia hahalok, buka lezadu rezolve tuir ona familia, sai mos hanesan sirkunstansia atenuantes ida hodi halo kmaan arguidu nia kastigu. Tanba nee Tribunal deside halo akomulasaun ba krime rua nee, hodi deside aplika pena prizaun tinan 3 suspende ba tinan 5 ba arguidu.
Tribunal mos esplika ba iha arguidu, durante periodu suspensaun nia laran arguidu labele pratika krime, se pratika krime foun mak arguidu sei ba kumpri tinan 3 iha Prizaun, hodi hein julgamentu ba krime foun nian.
Prosesu nee prezide husi Juiz koletivu, Arjentino Nunes, Zulmira Auxiladora, Ivan Patrocenio, Ministeriu Publiku reprezenta husi Prokurador nain ida, arguidu hetan asistensia legal husi Defensor Publiku, Humberto Alves.
(ter)
