DILI, STLTIMORLESTE.com – Diretor Servisu Investigasaun Kriminál (DSIK), Superintendente Xefe Polísia Joao Belo dos Reis hateten, Polisa Nasional Timor Leste (PNTL) liu husi Servisu Investigasaun Kriminál (DSIK) rejista ona kazu suspeitu sira neebe polísia kaer iha Suku Ulmera, Postu Administrativu Bazartete, Liquiça no Kampung Baru Suku Komoru Postu Administrativu Dom Aleixo ba ona Mínisteriu Publiku (MP).
“Kazu nee rasik rejista ona ho numeru NUK parte Ulmera nia 0248/26.PNSIK no ida iha Kampung Baru nian ho numeru NUK 0247/26.PNSIK,” hatete Diretor Servisu Investigasaun Kriminál (DSIK), Superintendente Xefe Polísia Joao Belo dos Reis ba jornalista sira iha Kuartel Jerál PNTL Kaikoli, Kuarta (15/07/2026).
Nia dehan, husi kazu Kampung Baru nian evidensia sira neebe rekolha mak nee, husi parte Kampung Baru nian Laptop totál hamutuk 12, telefone 18, depois Starlink komputador boot no seluk seluk tan hamutuk 18, karreta no motor balun mos PNTL prende.
João Belo esplika, iha parte Ulmera nian komputador boot iha 41 unidade, Laptop hamutuk 70, depois kadeira, meza sira mós ita lori hotu mai iha Investigasaun Kriminal hanesan evidensia ba asaun neebe sira halo.
“Pontu ida neebe mak relasaun ba prosesual ninian, hau sei la koalia sai, tanba prosesu investigasaun lao hela. Tanba nee segredu justisa, hau koalia sai buat nee la lao. Tanba prosesu ba ida nee ita envolve ema barak liu-liu tracking ba ida nee lao hela, neebe prosesu ba ida nee hau la koalia sai,” nia informa.
João Belo deklara, polísia mos halo trecking ba rede kriminal ida nee, tanba rede ida nee rede internasional.
“Tanba nee parseiru sira nee ita sente sira ajuda ita ba informasaun sira neebe mak iha konhesimentu diak iha aparelu diak para mai asiste ida nee mai,” nia koalia .
João Belo nuudar Diretor ba servisu Investigasaun Kriminál husu nafatin públiku liu-liu nia lideransa Komunitaria sira “Karik ema ruma tama ita boot sira nia bairu aluga uma ruma iha neebe karik, por favor atu kontrola depois komunika, karik buat ruma ita boot sira suspeita relasaun ba rede kriminal Internasional ida nee karik komunika ba ami para ami halo intervensaun,” nia afirma.
(jen)
