DILI, STLTIMORLESTE.com – Uniaun Estudante Universitariu Munisipiu Viqueque (UEUMV) husu Governu no Parlamentu Nasional, bainhira diskute Orsamentu Jeral Estadu (OJE) 2027 nian aloka osan boot ba iha setor produtivu sira, ba rendimentu ekonomia nasaun nian.
Lia hirak nee hatoo husi Uniaun Estudante Universitariu Munisipiu Viqueque (UEUMV), Caetano da Cruz iha ambitu Konferensia Imprensa iha Jardim 5 Maiu Colmera, Kuarta (15/07/2026).
Nia dehan, kada tinan Governu ho Parlamentu Nasional aprova OJE ba setor produtivu sempre kiik, tanba nee husu ba Governu OJE 2027 tau osan boot ba iha setor produtivu sira.
“Ami husu Governu atu aloka OJE boot ba setor produtivu sira, liu-liu agrikultor, turizmu, peskas, saude no edukasaun, tanba iha fulan Setembru ba oin Governu no Parlamentu Nasional sei diskute lei orsamental preparasaun OJE ba tinan 2027 ninia, tanba foin lalais EUNTL halo ona akordu ho PN atu husu para aloka orsamentu ba setor produtivu sira, felismente la akontese,” dehan nia.
Tanba haree fali relatoriu husi Lao Hamutuk iha tinan 2024, Governu aprova US$ 2.2 biliões ba OJE 2024 nian maibe ba Saude 6%, 6,2% ba edukasaun 9,2%, agrikultura 2%, iha tinan 2026 laos aumenta OJE para garante fila ba setor produtivu sira, maibe minimiza fila fali .
“Ita kompara ho tinan 2025 osan aloka ba agrikultura 2.3% husi alokasaun ba iha setor agrikultura, maibe iha tinan 2025 tun 1.9%, oinsa atu garante produsaun soberania alimentar, garante ekonomia ba produsaun eskola kiik produtu domestika iha rai laran, enkuantu uta la investe setor produtivu sira,” dehan nian.
Tanba nee UEUMV ezije ba Parlamentu Nasional tantu governu bainhira diskute OJE 2027 mak presiza tau imporantansia no osan boot ba setor produtivu sira, oinsa atu investe ba setor produtivu hodi bele halo balansu ba rendimentu ekonomia nasaun nian, para labele dependesia total ba fundus petroliferu, ikus produsaun mina maran obriga povu selu taxa, porkuantu nesidade povu nian deit responde ba ekonomia família susar tebes, depois ikus mai hatodan povu ida nee.
(joa)
